恒指反反覆覆，埋單仍有進帳39點。期指明日結算，即月低水18點，2月份低水12點，冇乜指導作用。上月底到昨日，恒指跌幅606點，估計進入2月，反覆中會有小康局面，形勢係個別發展。
和黃C輪3561：和黃（013）最高70.75元，收70元，冇升跌，C輪變化非常參差。4472最醒，收79仙，升8%，勝在溢價低，但交投極疏。熱門貨中，3812亦突出，收48仙，升5.5%，隻輪8月下旬到期，溢價6.1%，槓桿率14.6倍（有效7.7倍），引伸波幅23.8%，數據一般。
最死火嘅係3561，早段見過51仙後（前日收48.5仙），全日低收44仙，跌幅9.3%。正股冇跌而佢跌，可能同街貨較多（發行量416球，街貨佔54%），揸家信心唔夠有關。賭落去，始終同正股走向有關，抵唔抵則睇埋啲數據。和黃3G業務已走過黑暗時期，大行多數睇好。
講到隻輪嘅數據，一啲唔輸蝕，6月中到期，溢價3.4%，槓桿率15.9倍（有效9.0倍），引伸波幅23.1%。昨日忽然死火，博反彈諗得過。
新地C輪2252：新地（016）再升0.75元，收72.25元。C輪2252升34%，收4.7仙。咪貪勝不知輸，隻輪下月17日到期，最後交易日則係下月8日，得8日玩，8日內正股升唔過74元行使價，隻輪就變咗天津鴨梨。賭新地C輪，4643始終最啱睇。
恒隆地產C輪3664：幾隻收租股郁郁吓，恒隆地產（101）收11.50元，進帳0.30元。C輪3664收21仙，升5.5%，6月中到期，溢價5.4%，槓桿率5.5倍（有效3.8倍），引伸波幅29.3%，數據普通，交投太靜。要博，博正股好過。
章盛