羅家英上月證實患上腸癌第三期，早前開刀切除腫瘤後，現正康復中。家英哥暫時放下手頭上的工作，專心休養。醫生叮囑他現階段是關鍵期，一定要注意飲食。女友汪明荃笑言家英哥十分樂觀，切除腫瘤如剝牙一樣。
昨日有雜誌報道羅家英患上腸癌，並於上月在瑪麗醫院動了切除惡性腫瘤手術，近日正在康復中。家英哥除了定期食藥外，還到彌敦道國際詠春拳術總會，跟梁挺學詠春調理身體。
家英哥昨日談到患病經過時說：「我上個月個胃好痛，咪去睇醫生，驗血同照胃鏡都唔知乜嘢事，直至做咗磁力共振就發現咗患癌，重係第三期，之前都做咗手術，我𠵱家休息緊，醫生話未來一年係關鍵期，要小心飲食，盡量食啲清淡嘅嘢。」
家英哥表示一直希望把病情低調處理，甚至不肯明言是否患上十二指腸癌，他說：「我唔想人知，係怕人人都打嚟慰問，我都要講同一樣嘢，我媽咪已經八十幾歲，身體又唔好，我好擔心佢受刺激。」
早年抗癌成功的汪明荃（阿姐），昨日出現無綫將軍澳電視廣播城，談到男友家英哥的病情時，她說：「詳情你哋問番佢自己。」問阿姐最初獲悉家英哥患癌一事，是否很擔心？她說：「呢啲嘢冇得擔心，要睇醫生，相信醫生講嘅嘢，邊個想病吖？佢之前都做咗手術，呢兩星期身體會好弱，要慢慢調理，佢得閒都會行吓路當做運動，咁樣傷口會復原快啲，我都會鼓勵佢。」
問阿姐家英哥可有因病而向她撒嬌？阿姐說：「佢初時知道自己有病都好愕然，其實一直以嚟，佢身體比我強壯，但係病起上嚟好難講，佢𠵱家都停咗手頭嘅工作，全面休息兩個月，日前都嚟探過我班。佢早排入院，我都有陪佢，佢好樂觀，當係剝牙咁樣。」
採訪：卓寶花
