養傷多時嘅李鐵原本諗住慢慢恢復狀態，爭取上陣機會，點知佢日前喺預備組賽事中再次勇戰受傷，今季可唔可以再落場都成疑問，認真黑仔！
事緣李鐵替愛華頓預備組上陣，正選登場踢咗四十一分鐘，一次搶截同對手相撞後即時倒地，最後無法自己起身，要由急救人員用擔架床抬離場，經過半小時初步治理後，最後都要送去醫院作進一步檢查。據報，李鐵現時傷勢嚴重程度，須等待檢驗報告出咗先可以決定養傷幾耐。
李鐵去年尾曾經急於為國足復出，希望喺最後一場世盃外圍賽分組賽，對科威特嘅關鍵一仗中上陣；最後俾領隊莫耶斯勒令唔准，諗住等佢傷勢接近完全康復時再戰球場，點知𠵱家又傷。我求大俠希望佢唔好似孫繼海咁，要唞足成季。
最近英超好門將渴市，季初亦傳出好多弱隊鋼門唔同原屬球會續約，另求出路。不過，近日呢班門將包括米杜士堡嘅舒華沙同修咸頓嘅尼美齊表態留隊；日前，富咸嘅雲達沙亦續約年半，愛華頓嘅馬田亦動筆續約，怕且「紅魔」同「兵工廠」要喺其他聯賽先搵到理想門神。
車路士為咗同Umbro提早喺明年夏天完成合約，賠咗成二千四百五十萬鎊畀對方，有人覺得佢哋咁做好笨；但有消息話佢哋同Adidas傾緊一份總值三億鎊嘅十五年合約，成事機會重好高。雖則車仔班主阿巴莫域治使錢好似開水喉咁，但話晒都係生意人，點會做蝕本生意吖！
紅火蟻最近搞到香港人頭到大埋，而佢哋啲親戚就喺家鄉美洲搞搞震。聽聞巴西哥連泰斯嘅阿根廷前鋒泰維斯因為俾蟻（唔知係咪紅火蟻）咬，卒之瞓咗兩日醫院。但我求大俠收到風，泰維斯入廠另有內情，係俾隊友打至真；如果係真，咁啲蟻就慘囉，無端端做咗替死鬼。
柏蘭迪利都算幾運滯，話說今季初因為要照顧患病太太，被迫辭去羅馬教練一職；而日前佢同太太喺屋企飯廳食緊飯時，俾賊人入房偷走價值三十萬歐元嘅首飾同名貴手表都唔知，搞到佢連禮拜一個意甲足球奧斯卡頒獎禮都冇心機去。好彩柏蘭迪利夫婦冇受傷，算不幸中之大幸。
逢周一至周五見報