黑人金像影后荷爾芭莉（HalleBerry）主演嘅《貓女俠》劣評如潮，部戲重啱啱獲得金草莓最差電影頒獎禮七項提名，不過對見慣風浪嘅荷爾嚟講，呢啲挫折只係小兒科，早排佢重唔怕辛苦扮村姑拍咗電視電影《TheirEyesWereWatchingGod》。
雖然係電視電影，但係名嘴奧花雲費（OprahWinfrey）同老牌音樂人QuincyJones都有份做執行監製，製作應該有番咁上下，荷爾早幾日重特別同奧花一齊出席呢部戲嘅宣傳活動，可見佢哋都相當重視。其實呢部電視電影對三十八歲嘅荷爾嚟講都有特別意義，可以話係佢同黑人男星米高伊利（MichaelEaly）嘅定情之作，佢哋舊年就係因為一齊拍呢部片而擦出愛火花。
戲入面當然唔少得荷爾同米高嘅親熱肉搏場面，但身為女主角嘅荷爾都幾辛苦，因為佢喺呢部以二十年代美國鄉村為背景嘅戲入面，扮演一個受盡種族歧視嘅女人，所以佢喺入面唔可以再扮靚靚，反而經常要同啲小肥豬為伍，搞到成身泥污糟邋遢。
唔知係咪拍完呢部戲有感而發，荷爾近日炮轟荷李活仍然充滿種族歧視，佢表示：「有色女人依然要好努力搏命去搵好戲拍，我每一日都做緊呢樣嘢。」佢重話𠵱家要自己投資開戲先有戲拍。