中國奧運金牌跳水選手田亮自雅典奧運結束後，頻繁地出席商業活動及私下簽經理人公司，國家隊屢勸無效，昨日宣布將他踢出國家隊，跳水王子神話幻滅。香港游泳代表隊前隊員方力申，昨日直指運動員應該服從，被罰就要接受。
金牌跳水選手田亮自雅典奧運會後，頻頻出席各類型的商業活動搵真銀，又在沒有通報主管和國家隊的情況下，自稱有經理人及簽約英皇娛樂公司代理海外廣告權，早已引起國家體育總局關注，惜田亮在屢次警告下仍無悔意，昨日國家體育總局游泳中心終於宣布田亮不再是國家隊隊員，消息震驚中港兩地。
同樣是運動員出身的方力申，曾是香港游泳隊代表，繼而加入娛樂圈發展，他昨日接受電話訪問時說：「雖然我同田亮有相似嘅地方，但身份同層次都唔同，我當初游水係業餘性質，邊讀書邊游水，田亮由細到大都係運動員，佢嘅目標係為國爭光，爭世界第一。其實每個游水組織都有佢嘅規矩，我唔清楚佢點違規，作為運動員就要服從，俾人罰就要接受。」
方力申又表示會祝福田亮，希望他繼續努力，爭取返回國家隊，於○八奧運中為國爭光。問方力申會否覺得運動員轉投娛樂圈的路困難重重，他說：「唔只係我啦，NBA嘅奧尼爾都有出碟，如果田亮要爭奧運，又要兼顧娛樂圈，係會比一般藝人辛苦困難，𠵱家重要唔要入行由佢自己決定啦。」
吳君如昨日坦言一直很欣賞田亮，對於他被踢出國家隊一事，她惋惜地說：「我真係覺得係一件憾事，佢喺競技場上咁有風采，但佢每一次喺娛樂版出現就減低佢嘅風采，而且成日出埋咁多商業活動，真係乜嘢神話都幻滅晒。我覺得佢𠵱家選擇入娛樂圈急進咗少少，根本佢都未準備好，佢最好畀心機爭取入番○八年嘅北京奧運，之後再諗入娛樂圈都未遲，喺𠵱家咁嘅情況下入呢行，只會更負面，對喺娛樂圈發展一啲好處都冇。」
曾訪問田亮的葉璇昨日則在電話中說：「我覺得佢打扮光鮮嚟香港出席公開場合，都係尊重個場合啫，如果有能力裝身都唔係乜嘢問題。至於田亮始終係運動員，佢嘅工作首先要鍛煉好身手，但若時間配合出席公開宣傳，都可以接受，但大前提都要做好運動員本份。」對於國家隊的決定，葉璇表示感到可惜，她說：「我喺奧運場館睇過佢嘅比賽，佢身手好好，被踢出跳水隊真係非常可惜。」
而杜汶澤認為國家向來重視運動員形象，又指田亮離開跳水台後魅力大減，他說：「好似劉翔咁，佢對自己嘅行為一直都好小心，運動員除咗運動之外，亦同外交有關，國家注重佢哋嘅形象好應該。
「今次件事，係郭晶晶有檢討自己嘅行為，而田亮就冇咁做，我覺得係同佢哋身邊嘅朋友有關，郭晶晶識咗啲好朋友，識得教佢點做人處世，而田亮就冇咁好彩，識唔到咁嘅朋友，就算萬一郭晶晶被踢出國家隊，佢都重有機會嫁入霍家吖，但係田亮離開咗國家隊，又去得邊呀？演員離開片場、歌手離開舞台，都會減少咗佢嘅風采，身為跳水運動員，最大嘅魅力就喺跳水台上面，離開咗跳水台佢自然魅力大減，大家見佢早排出席各大商業活動，魅力都逐一減退啦！」
採訪：比華利、蔡如玉、黃君怡、張止寒
