紡織Ａ間公司經常要招待外國買家，但佢近年注意健康，戒煙戒酒，盡量減少應酬，對晚上玩樂地方，已經out晒。一個月前一位買家嘅老總來港，佢親自招呼，請老總去半島酒店食飯，飲靚紅酒，十點幾埋單就同老總講goodnight。事後聽見對方反應唔多理想噃。
歐洲買家又到，紡織Ａ叫市務董事去招呼，市務董事話：「老闆，我哋追唔上新潮流，好難招呼外國人。設計部有一位三十歲嘅英國仔，來港三年，住響蘇豪區附近嘅細單位，不如就吩咐佢去招呼對方啦。」紡織Ａ話：「英國仔喺公司級數低，怕俾人睇唔上眼噃？」市務董事話：「鬼有鬼路，唔使計咁多。」
於是英國仔奉命招呼歐洲買家。兩日後，市務董事帶買家見紡織Ａ，歐洲買家春風滿面，話香港充滿活力，與香港人做生意好易傾，更多謝紡織Ａ熱情招待，希望彼此以後多啲機會合作咁話。
客人走後，紡織Ａ立即叫英國仔入嚟：「你帶買家喺尖沙嘴、灣仔飲到好高興呀？」英國仔回報：「我第一晚就請買家去金鐘食一流意大利菜，食到十點就問佢是否介意去蘭桂坊飲番杯，佢話唔介意兼且Won'tmindhavingsomethingnaughty。咁就掂啦，我哋一直玩到朝早五點，先至送佢返酒店。第二日下晝五點，佢已經打電話畀我，話要再去蘭桂坊咯。」
紡織Ａ問：「飲酒邊可以飲到天光呀？蘭桂坊好多唔同款嘅酒吧咩？」英國仔咪咪嘴笑：「FCC以西方圓半哩之內，你要乜就有乜，由酒吧、豔舞以至表演，應有盡有，𠵱家就連愛情賓館都有埋，老闆想唔想跟我去玩番一晚？好多律師、會計師、有錢公子、上流人士喺度蒲㗎，保證全港最高檔。」紡織Ａ話：「我十一點就要上床，以後逢有鬼佬買家嚟，由你負責招呼！」