中記今晚搞周年餐舞會，主題係「璀璨星輝夜」，有得食有獎抽之餘，當然唔少得才藝表演，分四個組別，包括香港、九龍、新界同工商舖。
為咗先聲奪人，個別組噚日已經將參賽造型照，廣發傳媒，實行嚟個下馬威。
暫時最驚人嘅發現係，工商舖一眾非營業部同事嘅紙醉金迷look，一身金銀膶服飾，表演歌舞劇，果然夠照。新界區嘅參賽者，同樣係搞歌舞劇，精采服飾，未完全曝光，不過，姿勢十足，都唔可以睇小。
另外，中記亦搞咗首公司主題曲，名為「中原之歌」，曲詞都係由專業人士負責，今晚就會由老施帶領全場員工合唱。
歌詞方面，較硬銷嘅只係「靠中原來籌算」，至於「關心祖國目前」呢句，係老施屬意加添嘅，果然北望神州，心意不變。
本港地產代理，近年紛紛拓展內地及澳門業務，其中美記，舊年喺呢方面擺咗唔少心機，所以今個月要搞周年晚宴，都要逐個地區輪住嚟，香港、北京、廣州與深圳都已經搞過，嚟緊重有澳門及上海，總共六個地點，合計六場周年晚會，一共筵開三百六十五席。其中最多嘅，當然係香港，佔咗二百席。大家形容為好有發展潛力嘅澳門區，今年係第一次搞周年晚會，筵開十席。
地產代理成日都鍾意鬥邊個係冠軍，出年周年晚宴開幾多席，相信又有得鬥。
華懋荃灣如心廣場嘅酒店，終於決定六月開幕。
華懋售樓部經理吳崇武話，物業共分高低兩座，低座全幢都係酒店，高座係寫字樓加酒店，同低座並排嘅，係寫字樓，以上樓層就屬於酒店。
吳崇武話，兩幢物業有一道天梯連接，由低座嘅頂樓通去高座，呢條架空通道，會用玻璃建成。佢話，暫時未試用過，但係自己覺得，企喺咁高望落去，都應該幾驚。
透明嘅架空通道，的確幾有噱頭，不過，蘭西奉勸各位女士們，要行嘅時候就唔好着裙，以免走光。
世邦魏理仕投資部執行董事林偉漢指出，從「沙士」期間至今，樓價升幅可觀，尤其不少在樓市低潮時易手的大額投資物業，例如上環維德廣場、中環辰達集團大廈、尖沙嘴東英大廈等，估計市值升幅高達一倍半至兩倍。不過，業主惜售，暫時未有放盤。
對於市傳維德廣場以二十三億元放盤，以及灣仔告士打道八十八號，獲買家出價六億元洽購，林偉漢表示，他未有所聞，不便評論有關消息。
電郵地址：
