701收料站:中國綠色貨落強手

701收料站:中國綠色貨落強手

地產股噚日重現買盤,臨收市前恒指發力抽上,大升近200點,市場氣氛當堂好番晒。今日新股王朝酒業(828)掛牌上市,按佢嘅爆燈超額認購倍數,睇嚟今日會有一番熱鬧。
呢排好多芬佬對酒類同食品相關股份,似乎特別有興趣,好似經紀陳推介嘅金威啤酒(124),噚日股價表現相當勁抽,最高見過3.275元,收3.075元,升幅有成11.82%。至於上市唔算耐嘅福記食品服務(1175),就算超額配股隻綠鞋行使唔完,但股價一樣硬淨,噚日又升6.42%,收5.80元。
經紀黃話,炒股一樣要睇潮流,呢輪留意呢個sector會有着數。中國綠色食品(904)嘅街貨,聽講主要由芬佬坐晒,不妨望多兩眼。噚日股價升3%,收1.68元。
中國綠色上周公布截至去年10月底半年業績,盈利6205萬元人民幣,增加4.34%,中期息派2.97仙。隻股去年曾以每股1.46元配售1.05億股,個別芬佬亦有增持。
慕容小初