老牌馬主請食午飯，傾完財經大勢，就傾馬場趣事。老馬主呢兩年來冇養馬，一來因為公事太忙，周時外出公幹，冇時間去馬場；二來佢兩季前退役嘅新馬，賽績實在太曳，令佢興致索然。老馬主好懷念佢以前嘅練馬師Ｂ，認為阿Ｂ嘅判斷冇得頂，其他練馬師及唔上。
阿Ｂ初來香港之時，周圍挖馬，佢對老馬主講：「你嘅馬房成績差，就嚟散倉，不如拉隻馬過嚟我度。」老馬主念舊情，拖到新一季先至拉馬轉倉，隻馬已經跌到得五分，完全唔敢寄以厚望。操咗幾課，阿Ｂ竟然call老馬主：「今季可以贏四場，之後你就將佢退役，我同你買隻更靚嘅馬返嚟。」老馬主心諗，吹牛唔使咁厲害吖嘛？自己隻馬久沉不起，今季會贏四場？
第一次出賽，阿Ｂ話：「有機會贏，不過騎師水皮，買少少試吓先。」隻馬出閘第尾，轉彎大波歐，跑第尾返嚟。第二次出賽，隻馬二十五倍，阿Ｂ話：「我話隻馬可以贏晒，點解會咁冷嘅？你買多啲都唔怕。吩咐華人騎師沿途守住三四位，轉正直路搵空檔，剩番三百米就打鞭，打八鞭就可以頭馬過終點。」老馬主半信半疑，落注兩萬win，騎師依足阿Ｂ指示，打咗六鞭已經超越前領馬，推多兩下就贏咗。
第三次出快活谷，阿Ｂ叫老馬主班大隊入場慶祝，隻馬熱到兩倍半，老馬主覺得熱得滯，驚有風險，阿Ｂ竟然同佢講：「按咗你間屋嚟落注。」法國騎師唔知係唔係聽到呢句說話，有壓力，搏命打鞭，贏咗八個馬位，老馬主為之大喜，既贏大錢又喺朋友面前威到盡，做馬主最開心莫過於此。但阿Ｂ黑口黑面咁鬧個法國騎師，話佢贏咁多個馬位，隻馬一定大加分，損失一場額外頭馬！老馬主話阿Ｂ離港之後，入場好似冇咗支探射燈，久之就少咗興趣矣。