金草莓提名　布殊都有份
影后荷爾勢成爛片女王

專門選出全年最差電影同演員嘅「金草莓電影大獎」，前日啱啱公布咗提名名單。由金像影后荷爾芭莉（HalleBerry）主演嘅《貓女俠》，今年以大熱姿態囊括七項提名，將會同攞到六項提名嘅《亞歷山大帝》爭奪爛片界嘅最高地位。

哥連亦入圍
去年上映後劣評如潮嘅《貓女俠》，將角逐「最差電影」、「最差女主角」、「最差男、女配角」、「最差銀幕配搭」、「最差導演」同埋「最差劇本」七個獎項，而《亞歷山大帝》亦唔輸蝕，除咗被提名角逐「最差電影」外，重「帶挈」埋哥連菲路（ColinFarrell）同安琪蓮娜祖莉（AngelinaJolie）齊齊入選「最差男、女主角」。
至於由米高摩亞（MichaelMoore）執導嘅話題紀錄片《華氏9/11》，亦都造就咗美國總統喬治布殊獲「最差男主角」同「最差銀幕配搭」提名，同樣喺套片度出現嘅美國國防部長拉姆斯菲爾德就得到「最差男配角」提名；而美國新任國務卿賴斯同埋女歌手BritneySpears，亦會一齊角逐「最差女配角」，認真搞嘢。

下月尾揭盅
適逢今年係金草莓二十五周年紀念，上界威盡金草莓、由班亞弗力（BenAffleck）同籮霸珍妮花洛庇絲（JenniferLopez）主演嘅《愛情標錯心》，亦順利入圍角逐「二十五年來最差喜劇」。而頒獎禮嘅所有結果，將會喺下月二十六日揭盅。