阿仙奴日前將俾差佬告醉酒駕駛嘅二十二歲翼鋒彭拿治借畀伯明翰，直至季尾為止，再定前途；咪以為伯明翰執到筍嘢，查實都係博一博，事關彭拿治可能要入獄。
喺十六歲從諾士郡以二百萬鎊加盟阿仙奴嘅彭拿治，喺禮拜日揸隊友A高爾架賓士外出，點知發生意外撞落條燈柱度；事後佢吹波波肥佬，俾差佬落案起訴；由於佢停緊牌，但重敢醉酒駕駛，所以入獄機會好大。
彭拿治紀律向來唔好，醉酒駕駛經已唔係第一次；阿仙奴領隊雲格出名嚴，或者覺得彭拿治佢冇得救，於是即刻將佢借去伯明翰；而因佢季尾就約滿但獲續約機會好微，變相提早離隊。
阿仙奴送走彭拿治後，加上伊度走硬，G施華重養緊傷，中場球員買少見少；雖則佢哋喺歇冬期嘅球員轉會市場完全唔活躍，不過為咗維持實力競逐英超聯同埋歐冠盃，相信佢哋有機會好似上屆咁買雷耶斯咁，失驚冇神喺呢幾日內簽個猛將返嚟。信乎？
有傳皇馬體育總監沙基，重未想同包括炙手可熱嘅蘇拉利等將於今夏約滿嘅幾位球員傾續約。咁做分分鐘俾其他球會免費撬人㗎，沙基「拍乸」布達堅奴即刻補飛，點名話會同蘇拉利續約！我求大俠認為摩連迪斯已係人辦，蘇拉利走人可能重有更好發展，咪鬼睬佢哋啦！
車路士後衞格連莊臣話佢哋之所以咁團結，皆因成日一齊打電視遊戲；而佢重話，試過有一次成十六個人去泰利屋企打足球機，最後佢贏咗冠軍㖭。聽聞有人將足球機當足智彩咁玩，設「讓球盤」同「讓球主客和」等，唔知格連莊臣佢哋有冇注入賭嘅元素，以提高遊戲嘅刺激性呢？
巴塞隆拿今屆咁掂，佢哋嘅荷蘭籍教練列卡特功勞唔少；而佢哋嘅死對頭皇家馬德里有見及此，亦向荷蘭搵救兵，不過就唔係買人，而係買草皮。皇馬話荷蘭南部啲草好靚，好適合佢哋嘅巴拿比奴球場，所以決定用嚟重鋪個場。即管睇吓佢哋用咗「荷蘭草」之後，六條煙係咪會勁啲。
澳洲聯賽冠軍球會珀斯，噚日宣布委任前利物浦球員麥馬漢為新教練。計埋𠵱家教緊紐卡素（唔係英超聯嗰隊紐卡素）嘅雲拿保斯，澳洲球壇就有兩個有名氣嘅英籍教頭；雖則英格蘭冇乜澳洲籍領隊，不過就有好多澳洲球員。唔怪得啲英格蘭同澳洲係球壇兄弟啦！