古巨基呢期人氣認真犀利，嚟緊三月會喺紅館舉行第一次個人演唱會，噚日三場演唱會嘅門票公開發售，喺紅館門外就有成二百幾人排隊，又有着住校服嘅歌迷唔返學嚟排隊㖭，啲飛喺一個鐘內賣晒，打破咗許冠傑最快賣晒飛嘅紀錄。
不過馮仁昭就覺得好難比較，因為大家場數唔同，基仔噚日喺銅鑼灣出席活動時都話：「吓？唔知喎，大家場數都唔同，但係賣晒啲飛，全公司同事都好開心，老闆（黃柏高）打畀我報喜時重開心到笑騎騎，𠵱家重度緊期加場㖭。」
基仔同許志安開個唱時間相當接近，兩位新天王難免俾人比較一番，而且安仔嘅門票銷情似乎唔及基仔，搞到基仔好似追打緊安仔一樣，基仔對此即刻謙虛咁話：「唔好咁講，總之多謝大家支持啦。」
噚日基仔同埋一位小愛神宣傳情人節活動，佢見到小愛神好鬼開心，猛咁稱呼佢做「阿嬌」，好怕醜嘅小愛神，只肯錫基仔塊臉，但就唔畀基仔錫番佢喎。
林志玲噚日收到台灣唔同嘅調查報告，佢成為大學生心目中最佳老師人選之一，不過，其中一本雜誌就選佢做最需要反省檢討嘅女藝人第二名，林志玲話：「大學生選我是最喜歡的老師，我真謝謝他們，我從小就想當老師。至於無理的批評，我不在意，更不會影響心情。」
霍啟剛自從同跳水公主郭晶晶拍拖後，連月以嚟做咗城中風頭躉，前日就突然有傳霍啟剛喺夜店同人起爭執，混亂中有人有所動作，不過聽聞就冇驚動警察。依馮仁昭話，作為公眾人物嘅都係少蒲為妙，否則飲大咗有乜嘢拗撬，分分鐘都係自己蝕底咋。
巴西國家足球隊下月九日（大年初一）嚟香港踢賀歲盃，電視播映權一直有傳係無綫攞到。噚日馮仁昭就收到消息，無綫已經喺前日簽咗約，落實播映權，到時翡翠同明珠台將會齊齊直播。但係唔知係咪吸取咗上次主持奧運嘅藝人「講多錯多」呢個教訓，今次播映球賽時將會用番啲專業人士。
郭可盈同林文龍結婚之後一直好恩愛，但噚日就有雜誌寫可盈同馬德鐘因為合作拍無綫劇集《酒店風雲》而日久生情，重話馬德鐘大獻殷勤，終於打動芳心。郭可盈噚日同馮仁昭講電話，佢話：「本雜誌上次就寫我同佢（馬德鐘）不和，今次就寫我同佢搭上，我都覺得冇乜嘢可以回應喇！」
