又跌1日，恒指唔見94點，收報13386。最低之時，散百六點，收市冇咁肉酸。周五期指結算，話唔埋呢幾日，期指市場活動家再踩多兩腳，食埋尾胡，2月份再玩過。05年第1個月，恒指大概都會冇咗1千點，幅度唔算細，下個月，向上炒搵銀機會大過向下炒搵銀。
滙控C輪4441：滙控（005）最低見126.50元，埋單127元，跌1格。去年10月，滙控幾乎成個月喺125元上下拉鋸，𠵱家又回到接近呢個平台，估計125元個位守得好穩，除非有特別不利新聞。
滙控C輪4441創新低，最低見36.5仙，埋單38仙，跌5仙。10份輪兌1股正股，輪價跌幅跟足正股。有貨在手者，畀啲心機揸住先，喺低溢價而正股跌近強大支持位情況下止蝕沽貨，心有不甘。冇貨在手者則分段吸納，博正股守穩125元。4441喺6月尾到期，溢價0.5%，槓桿率33.4倍（有效18.5倍），引伸波幅10.5%，數據靚極。
中移動C輪3589：中移動（941）收23.45元，跌0.40元，下試23元齊頭位有可能。低見23元，細細注買C輪3589。隻輪6月下旬夠鐘，輪價11.4仙，溢價7.2%，槓桿率20.6倍（有效9.3倍），引伸波幅24.5%。中移動C輪中，最易買賣係佢，數據亦冇離譜。
信德C輪：濠賭股唔得，信德（242）亦偏軟。唔覺唔覺，信德C輪已有5件掛牌，最長壽嘅明年6月到期，溢價27.3%至43%，槓桿率3倍至4.8倍，冇1隻博得過，交投又少，輸錢想投降都好辛苦。
章盛