商場拆售潮出現暗湧，據報有買家上唔到會，皆因業主定價甚為進取，銀行借貸就好審慎。
好似尖沙嘴重慶站，同深水埗深之都，就有買家投訴，搵唔到銀行借錢，可能成交唔到。
負責搞分拆嘅中記話，好多銀行都肯為重慶站做按揭，諸如滙豐、中銀、星展咁，之但係估價約係成交價八成，貸款額為估價五至七成。例如一個百五萬細舖，銀行可能只肯放六十萬，即係樓價四成，買家要自掏九十萬至成交到。
中記話，深之都嘅按揭，重同銀行商量緊，暫時未定借貸額去到幾多。呢個場個幾月前拆售，賣咗七成，而重慶站就賣咗五成，業主封咗盤。
另外灣仔太原集個業主都封埋盤。
其實，近月拆售嘅商場，價錢拍住街舖，銀行估唔到價並唔出奇，買家要自保，惟有先問定銀行至好簽約。
投資老手羅家寶，以五千五萬接咗個中環酒吧舖，回報有五厘幾，算係市場罕有。
個舖係德己立街二十七至三十九號A，千五呎，加九百呎閣樓，呎價三萬六，月租二十五萬，回報都算高。
核心區舖價高企，中環值得追落後。
同時，旺角最貴街道西洋菜街二Y二號舖，二百呎，上年三千四萬成交，後來取消，剛有個姓劉嘅投資者以三千五萬買入，十七萬五千蚊一呎。
買家有中資背景，近期買過砵蘭街舖，似乎幾睇好旺角舖市。
代理行業競爭大，要分秒必爭，不時聽到為促成交易，要送定到外地，最近又有一宗，地點係澳門。
話說業主喺澳門做生意兼長住，一年返港次數少之又少，佢九八年買入嘅荃灣愉景新城十二座五百九十三呎中層B，放售一段時間，初期因叫價高而乏人問津，但𠵱家嗰價貼番市，所以畀個外區投資者睇中，由二百一十五萬講價至二百零五萬。中原分行經理余俊文話，為免夜長夢多，即日派人送定去澳門畀業主，終於促成交易。
單位有裝修兼小量家具，估計月租可達七千五，回報有四厘四。業主因為高峯期入市，𠵱家仍然要蝕五十九萬。
尖沙嘴漾日居TowerV拆售唔夠十日，賣出四十伙，包括四個複式，其中兩個喺周末成交，高層F室複式，二千六百呎，成交價二千八百萬，呎價萬一，買家係投資者。
中層E複式，同呎碼，作價二千六百萬，呎價一萬，買家係換樓客。
區內代理話，咁好賣，因為能夠網羅用家同投資者，用家見呎價比同屬九龍站上蓋嘅新盤低，所以入市；至於投資者，就睇中租客主要嚟自大公司僱員，唔擔心收唔到租，租金收入有保障，因而長線投資。
三十五個熱門屋苑，上個禮拜得百九宗買賣，比前一周少八宗。睇落好似冇乜大變，但係若果睇闊啲，原來自從舊年十一月，每周一直未能突破二百宗，同賣地前嘅二百五六宗，差一大截，可見二手市況只係平穩。
港九新界三區，其實只得新界成交減少，但幅度都幾大，跌近一成八，得番七十宗。
美聯首席分析師劉嘉輝話，重有唔夠一個月，就係農曆新年，睇嚟呢段期間，每周成交，都唔會好得去邊。不過，一手市道就因為有新盤開賣，氛氛好番啲。
貿易發展局近年都有喺內地搞房地產展，今年會喺三月上旬舉行，地點係四川成都，係第一次喺呢度辦展覽。
點解揀成都，原來因為舊年成都嘅商品房，銷售樓面約一億零四百萬方呎，係歷年之冠。
貿發局服務業拓展總監葉澤恩話，成都房地產市場，正處於發展階段，好需要引入香港嘅先進技術，同埋豐富經驗，包括規劃、建築、室內設計、工程、建造、測量、估價、項目管理、物業管理，以及銷售代理等。
唔怪得今次展覽會，有近三十家香港公司參展啦！
利記周滿傑話，舊年土地註冊處錄得二千五百一十六宗商廈買賣登記，比前年增八成；總值二百三十二億，增兩倍。兩者都係九八以嚟新高。
周滿傑話，總值升幅遠高於宗數，係九十年代以嚟罕見，估計因有幾宗全幢或者大手成交，好似恒基買入中環皇后大道中九號四層，就已經近五億。
成交原主要集中喺一線地區，增幅均逾倍，但係外圍，好似北角、油麻地同旺角咁，增幅最多都唔過八成。佢估計，今年商廈成交量最少增三成，直迫九七。
蘭西
電郵地址：