農曆年逼近，屋企大件家具都換得七七八八，睇嚟親戚朋友到訪應該都唔使失禮！但可有想過人家嚟拜年，斟茶遞水將會係指定動作，重用屋企那套崩口茶杯茶壺招呼客人，實在太失禮。不如今日就揀定啲茶杯、茶壺同茶具套裝，咁就唔會失禮街坊啦！
記者：梁彩燕
攝影：陳陶鈞、伍慶泉、周旭文
Model：Crystal（CoolFactory）
襯埋一Set款靚得體
但凡選擇買套裝，大都係考慮到花紋款式夠統一，唔使左揀右揀三心兩意。市面上的茶具套裝亦照顧周到，包晒茶壺、茶杯，有啲重有埋茶杯碟或杯蓋。款式方面有傳統中式應節套裝、日式或西式都有，亦有全人手燒製或豪華款式。
百福好意頭
中國人最注重好意頭，呢款印滿唔同字體的百福瓷器茶具套裝，一套包括中式高身茶壺、4隻有耳杯同托盤。白瓷襯藍字款式，傳統得來不覺老土。
售價：$170(a)
手製葫蘆壺
呢套河南均瓷茶壺套裝，以人手燒製同上色。有4隻小茶杯，茶壺打側望好似成個葫蘆，渾圓嘅壺身又有個粗身壺柄，茶壺同茶杯都較重身及厚身，造型獨特。
原價：$880
特價：$308(a)
傳統有田燒製法
日本有田燒茶具套裝，包括茶壺同5隻連蓋茶杯，採用較少有而出名的傳統「有田燒」燒鑄方式製造。表面畫滿日式彩繪圖案，有埋杯蓋可供焗茶使用。
原價：$548
特價：$383.6(b)
趣致人仔點綴
一套5隻杯的套裝，全以人手上色，鮮豔的紅花圖案同藍格仔杯邊，甚富傳統日式Feel。細心留意，重發現有啲人仔爬喺茶壺邊同每隻茶杯邊做點綴，好得意！
售價：$838(c)
最啱知己HighTea
呢套專飲西茶的茶壺套裝，全套包括一個高身茶壺、一個奶壺、一個糖壺，重有6隻有耳杯連碟。全套由日本製造，細緻的孔雀圖案加埋金邊設計，夠晒豪華，啱晒三五知己聚埋HighTea。
售價：$760(d)
萬壽杯招呼長輩
萬壽無疆茶具套裝，無論款式以至顏色都咁傳統，一套不但有齊茶壺同6隻有耳連蓋杯的茶杯，亦包埋同花煙灰缸一個，全部有如意邊同寫有萬壽無疆字樣，用嚟招呼長輩包冇失禮。
原價：$198
特價：$148(b)
金漆圍邊添華麗
日式的茶壺柄通常都係設喺壺頂，手柄亦多以織藤或木質為主，此款漸變色藍白茶具，茶壺和茶杯的款式都較簡潔，髹上光漆後更顯得光滑，金邊設計亦多添華麗感。
售價：$269(b)
罕有紫色茶壺
呢套河南均瓷茶具套裝，設計較新潮同西化，特別高身同粗身的茶壺柄，配合埋超細壺嘴，款式夠特別。紫色的茶壺茶杯在市面上亦較少有，以人手製造，所以每隻茶杯嘅高度都略有不同。
原價：$880
特價：$308(a)
玩款茶壺人見人愛
若然唔想買成套茶具套裝的話，市面上亦有很多別致茶壺供選擇。茶壺款式愈出愈多花臣，除了應節雞年圖案同中式茶壺外，重有設計到好似裝飾品一樣的款式，潮人家居必備。
靚到做埋裝飾擺設
若自問個人比較西化或鍾意搞鬼擺設，呢個高身瓷質茶壺應該可以成為你的新寵。全人手造，外形好似舊式Espresso咖啡機，銀色杯盤則充當壺蓋，夠晒特別！
售價：$699(e)
公雞圖案全年啱用
呢個陶瓷茶壺以白色做底色，襯托起顏色鮮豔奪目的公雞圖案，搶眼又鮮明，應節得嚟又唔Out。藤製手柄可以隔熱又帶有和風Feel，有埋茶隔設計，方便用家。
售價：$120(g)
光滑鴿形小壺
外形好似和平鴿，壺身又光滑無痕，成個茶壺身形極有曲線美。咪睇佢身形細小，可以沖到一至二人份量，隨壺亦附送埋隔茶網，另外亦備有灰色選擇。
售價：$220(i)
款式簡潔樸實
若崇尚自然的話，呢個墨綠色陶瓷茶壺就啱晒。具純樸自然品味，手柄以織藤製造，顏色、用料同款式都好踏實，亦頗有和風格調。
售價：$160(h)
日式彩花紋
有日式花邊的茶壺，係西式定中式已經唔太重要，靚就得喇！壺蓋、壺邊同手柄位都印有彩花紋，而壺身就有暗花圖案，全由日本製造，手柄設計特別闊身，方便又就手。
售價：$181(c)
杯形茶壺
呢個只得一隻杯大小的瓷製茶壺，防漏壺邊同特細壺嘴的設計，睇落幾特別。表面有色彩奪目的花朵圖案做襯托，好鬼Cutie。
售價：$49.9(f)
茶杯款式中西化任揀
茶杯係我哋平時用得最頻密的茶具，用咗成年可能大家已經碰崩撞爛唔少隻！都係時候為屋企揀番啲新茶杯招呼客人。要傳統中式杯、有杯蓋、有杯耳甚至焗盅款式都有，質料以瓷器佔最多。
雞圖案系列
德國Rosenthal的餐具製品出名高品質，呢隻雞仔圖案茶杯係今年雞年系列的其中一款。兩邊都分別印有母雞同公雞圖案，夠晒應節！
售價：$240(c)
如意萬壽杯
寫有萬壽無疆字樣的茶杯，意頭十足，杯邊有如意邊，而杯身、杯蓋以至手柄都有青花加上彩紋。最傳統的藍色撞上粉橙色，感覺冇傳統杯款咁老土！
售價：$27(a)
景德鎮焗茶盅
呢款茶杯，以黃色底色襯起幾條活潑錦鯉魚，望落零舍生動搶眼，圖案後又寫有「有余」字樣，重係來自江西景德鎮，夠晒古色古香。
售價：$70(a)
八仙過海好兆頭
杯身以民間故事「八仙過海」做主題的潮州製茶杯，八位仙人的動態同動作都各有不同。杯蓋有八仙各顯神通的仙具，款式吸引，附有茶隔，泡茶一流。
售價：$68(a)
黃山松景
貴為中國十大風景名勝區之一嘅黃山，山中嘅奇松、溫泉、雲海同怪石被稱為黃山四絕。呢款杯就以黃山上嘅松樹做主角，未可親身到黃山一遊，買番隻杯解住渴先喇！
售價：$55(d)
健康十訓要照做
日本製的茶杯，杯身上寫滿咗「健康十訓」。呢啲格言提醒我哋平時生活應如何注重健康，例如要少肉多菜、少糖多果、少憤多笑等，一於今日開始就多飲水少飲汽水！
售價：$22.5(d)
售賣點
(a) 裕華國貨 23840084 九龍彌敦道301-309號
(b) 西田百貨 26941111 沙田新城市廣場3期2樓
(c) 崇光百貨 28338338 銅鑼灣軒尼詩道555號
(d) 公啟行 25441503 上環文咸東街59號安榮大廈地下
(e) 斗室 29158132 上環荷李活道123號荷李活華庭3號舖
(f) 實惠 26638833 銅鑼灣怡和街1號香港大廈地庫
(g) Choice 23428923 觀塘開源道73-75號業發工業大廈二期1樓10號舖
(h) G.O.D. 27845555 尖沙嘴海港城香港酒店3樓
(i) LOG-ON 22658868 九龍塘又一城UG-01舖