報壇老前輩才哥召左丁山吃午飯，自然從命。去到萬豪殿，才哥已經與幾位老友在座，左丁山急忙趨前，遲到唔好意思。才哥話退出江湖之後，仍然坐喺唔少委員會、街坊會、校董會，公職生活沒有停下來，重係好忙。長者愈忙愈好，有工作做先至容易保持腦筋靈活、行動敏捷也，才哥面色紅潤，講說話徐疾有致，可以講係老而彌堅。
在座幾位都與教育有關，校監Ｌ話：「𠵱家搞幼稚園辛苦過乜，搶學生競爭激烈。我哋辦一間幼稚園，去年八月收樓（公共屋邨），九月開學，真係做到有氣冇碇唞，隔籬有一間幼稚園，已開辦兩年，佔有地利，下下同我哋鬥貼街招、鬥宣傳，我惟有叫屋邨經理做中間人調停。好彩我哋塊招牌有號召力，𠵱家已經有過百名學生，心都定啲。」
出生率年年下降，初生嬰兒不足，幼稚園已成為夕陽工業，校長Ｈ辦幼稚園多年，好彩招牌夠老，聲譽好，仍然頂得住。校長Ｈ話：「小學重慘，唔知幾多小學嚟我間幼稚園招生，用銀行界術語，就係做路演。小一招生起碼要有二十三人，係小學生死存亡嘅關鍵，小學校監、校長以至教師，每年都誓師高呼『一個不能少』，因為少一個學生，達唔到教統局目標，就要殺校，成班老師三至五年內失業，失咗業就好難搵番教職。你唔好以為商界競爭激烈，小學收生先至殺到血流成河也！」
「一個不能少」好似係教育改革口號，意思係話盡量照顧學生，一個也不能遺漏。點知道教育界活學活用，高呼「一個不能少」，就係為小學一年班拚命搶新生，少一個就關乎學校命運。校監Ｌ與校長Ｈ話潮流不可抗拒，香港人唔肯生仔生女，幼稚園與小學合併或受淘汰，只係時間問題。嗌「一個不能少」只係聊盡人事，為老師保存一份教職而已。