梁朝偉、舒淇和任賢齊合作的新片《韓城攻略》將於下月五日上映，偉仔和小齊兩位男主角在《韓》片中有不少打鬥場面。
其中一場戲是兩人夾手夾腳捉賊，偉仔駕駛着跑車，而小齊則駕駛着電單車，分別追趕馬路上的小型飛機，然後撲上去捉賊，該輛小型飛機更是特別斥資數十萬訂購。
偉仔日前說：「其實只要時間預計得好，要我跳上飛機都冇問題，我嘅身手都唔錯，都應該應付得到。」對於有些鏡頭要在機翼上拍攝，雖有難度，但偉仔說：「最緊要保持平衡，如果唔小心就會滑低，好彩動作指導係我以前喺無綫拍劇嘅替身，佢好了解我嘅體力，否則佢就幫我做替身，所以最辛苦都係佢。」
小齊表示最難忘是在小型飛機上一場打鬥戲，他說：「飛機係咁郁，機艙裏邊好窄，做每個動作都要格外小心，拍完呢場戲，我手手腳腳都瘀晒，個頭又起埋『樓』，好彩效果都好滿意，辛苦都值得。」
