紐卡素輸畀阿仙奴意料中事，但就爆出比拿美同領隊桑拿士再不和，重要係俾主持人訪問時即場拆穿今次不和事件。
事緣比拿美賽後接受電視台記者訪問時表示話根本無傷無病，好想上陣比賽，但記者即時話畀佢聽，之前從桑拿士口中得知解釋，話比拿美星期五練習時受傷。究竟是真是假，我求大俠就唔知，之不過舒利亞復出，比拿美上仗已被安排左中場位置，相信會有關。舒利亞已經撐桑拿士，主席就撐比拿美，點搞？
桑拿士接掌紐卡素後同球員不和傳聞不絕，除比拿美外，班納、羅拔同古華特亦有份。「紐記」𠵱家徘徊聯賽榜中游，同尾三修咸頓相差十一分。桑拿士如果再唔似哈利列納同曉士咁，專心幫球隊救亡，莫講話下屆足協盃，分分鐘跌落降班漩渦。
「仇人見面份外眼紅」，朗拿度喺對馬略卡嘅比賽中零舍落力，皆因想喺古柏面前入波示威。但教練盧森貝高喺下半場森美爾射成二比一後將佢換走。朗拿度離場後被人影到將件衫掉落地。事後盧森貝高話換人實會有人唔高興，重話呢啲係球員嘅個人問題喎，朗拿度今次認真冇癮！
意大利傳媒近日進行意甲喜好調查，項目眾多，較特別係球迷選出最友善球員，第一位係托迪，第二位係加度素，好明顯球迷無因為鬥牛㹴球場上作風勇悍，而對佢偏惡。又係嘅，佢踢波鬥心十足，平時又謙虛，例如話舒夫真高比自己更適合做未來AC隊長，難怪得到球迷歡心。
球證凱沙喺地區球隊柏達邦贏甲組漢堡四比二嘅德國盃首圈賽，涉嫌吹黑哨而受調查後，凱沙認買咗柏達邦贏嗰場波！凱沙雖然之後反口，但事件喺德球壇有好大迴響，德足總就話想禁球證投注足球，漢堡同當時嘅漢堡教練托比慕拿，重話考慮向凱沙同埋德足總採取法律行動！
紐約人炒教練後，暫由助教靴拔威廉斯頂上，不過傳佢哋想搵禪師積遜掌帥。睇緊澳洲公開賽嘅積遜就話未有人聯絡佢，重話如果係真一定審慎考慮。咁又係，紐約係全美嘅重心，係嗰度教波梗吸引；不過隊波家吓咁沉，真係神仙難教。不如度完假，下季先接手喇！