港股噚日受到長和系拖累，早市低見13320，最後收報13386，跌94點，成交164億元。長實（001）挫2.8%至69.50元，和黃（013）挫1.78%至69元。
南華證券（619）噚日逆市升59%至0.159元，若果睇番近期走勢，此股由1月12日的6.7仙起步，累計已升76%。近期常見到有小型股突然大幅炒上，跟住就話有濠賭股概念。黑客話，南證異動亦可能與濠賭概念有關，皆因近期濠賭熱潮令證券行佣金收入大增，而有份坐盤的證券行若睇啱位上車落車，將大有斬穫，市場傳聞南證喺呢方面賺咗唔少。
其實濠賭概念股近期表現好反覆，主要受制於內地嚴打賭風，駿雷（070）雖然有收購賭船權益消息公布，但復牌後股價一度下挫21%，跌幅最後收窄至5%。邁特（1031）、祥泰行（199）及瑞力（491）則分別下挫14和12%。不過，i師傅叫阿虎留意殼王旗下的永安旅遊（1189），聽講有人正在收集中，貨源歸邊後，便會有動作配合炒上。
聯想（992）收購IBM電腦業務傳可能出現變數，隨時會告吹，據講主要是美國怕聯想利用IBM電腦業務從事間諜活動。但消息傳出後，聯想股價反而扯高，大升7.4%至2.175元。
聯想去年12月3日停牌，停牌前報2.675元，在公布高價收購IBM電腦業務後，股價反覆下跌至2元，反映市場唔睇好呢單交易，如果真係告吹，可能會當好消息炒，將股價抽回2.60元水平。
阿虎