雖然大市氣氛唔好，但一樣有人成功批股集資，而且一陣間就搞掂，真係唔到你唔服。經紀黃話，上市夠半年的製衣股聯泰控股（311），噚日收市後公布配股，集資3億幾銀，但好快趣就足額，似乎芬佬真係好捧場。
聯泰昨日下跌0.57％，收報4.375元，成交金額957萬元。
另外，上周傳出喜力有意增持金威啤酒（124），刺激股價大升。但噚日有大陸傳媒報道，話喜力只會出價每股2.50元增持，而且唔會有全面收購。消息令金威啤股價應聲大跌10.57％，收2.75元，成交股數1903萬股，金額5467萬元。
但經紀陳話，佢由大陸方面收到嘅消息唔係咁，喜力增持金威作價唔只咁低，以哈啤舊年單收購作參考，作價去到成50倍PE，廣東省政府又點會將金威啤平賣？況且外資啤酒公司在大陸市場競爭十分激烈，你唔要時大把人有興趣，所以呢單交易應該重有下文。
慕容小初