關心妍（阿Jade）、Boy'Z、吳浩康同五月天前晚去無綫做《勁歌金曲》嘉賓，譚詠麟就做嘉賓主持。早前劉德華話若果李克勤結婚，佢可以負責做伴郎或者司儀，問阿倫打算做乜？阿倫就話：「你哋套我唔到嘅，我唔知克勤幾時結婚，只知道克勤同華仔呢排頻密切磋（打保齡）。」
阿倫又話克勤最近成日想去旅行，問係咪去度蜜月，阿倫話：「度蜜月日日都可以，我提議佢哋兩個一齊搞聯婚，咁就係劉李……跟住係乜乜聯婚呢？」
記者問係劉李盧乜，阿倫話：「跟住係乜呢？我就係唔記得佢姓乜。」記者提佢有個名叫麗倩，阿倫於是話：「有啲印象啦，我有聽過，但係冇心裝載所以唔記得。如果佢哋一齊搞聯婚，我就任佢哋吩咐，做乜都得。」記者話出年係盲年，阿倫話：「咁就一齊衝開盲年障礙啦！」
此外，最近有報道話關心妍扮大牌，買衫要求舖頭關門，關心妍話：「呢個人不時sende-mail畀我嘅fans同報館，我同律師商討過，如果佢再玩落去就會採取行動。」
而阿Jade噚日去商台接受訪問，話已經同律師會面，佢話：「今次件事已經困擾咗我三個月，嗰個人最近又打電話畀雜誌記者同亂發e-mail，搞到我身邊朋友都問我件事係唔係真。」阿Jade再次強調呢件事嚴重影響佢嘅聲譽，故同律師商議後決定追究，又話自己只係一個小歌星，根本冇權要求人哋關門。
韓國女星金晶銀噚日同朴新陽去咗台灣宣傳韓劇《巴黎戀人》，佢着咗套露背Chanel晚裝同Gucci高踭鞋，形象高貴。金晶銀喺劇入面扮演愛上太子爺嘅窮留學生，所以有時都會着吓名牌衫。金晶銀嘅拍檔朴新陽話：「我嘅角色要扮大老闆，所以戲服嘅西裝同領呔次次都唔同嘅。」
陳小春媽咪上個禮拜因為肝癌過身，小春呢幾日心情好差，雖然佢唔想畀傳媒知道呢件事，但係消息都係傳咗出嚟，馮仁昭噚日打電話畀小春中國星經理人公司嘅負責人李小姐，李小姐話小春對呢件事唔想回應，但李小姐就證實小春媽咪過身一事。
Boy'Z前晚上《勁歌》，Kenny同Steven係最後一次以Boy'Z嘅名義演出，之後Kenny會獨立發展，Steven就另覓新拍檔，Kenny話自己好唔捨得，而Steven就話自己好唔開心，問佢會唔會羨慕Kenny，佢話：「我冇所謂，有得唱就會做。」
內地天后那英同高峰嘅愛情故事一直都係中、港兩地嘅焦點新聞，而佢哋日前就接受咗內地報章訪問，暢談佢哋嘅戀愛故事，原來佢哋九五年相識至拍拖，都經過唔少次離離合合。那英又話雖然早排出現咗高峰「私生子案」，但都會企喺佢嗰邊，而高峰就親口證實：「我們早就結婚了。」
