一年一度法國最盛大嘅NRJ音樂頒獎典禮前日喺康城舉行，當晚可謂星光熠熠，除咗獲得「全年最佳國際男歌手」嘅Usher大受注目外，首次披露全新大碟歌曲嘅籮霸珍妮花洛庇絲（JenniferLopez）亦謀殺記者唔少菲林，不過就俾性感嘅瑞典名模VictoriaSilvsted搶去唔少風頭。
沉寂一排嘅籮霸前晚以一套開胸西裝擔任表演嘉賓，同一班扮成性感學生妹嘅dancers跳勁舞，重率先披露新歌《GetRight》。不過論性感，籮霸就比唔上着低V同開衩長裙嘅瑞典名模VictoriaSilvsted，真係有啲失威。
而去年紅透美國樂壇嘅Usher，前晚打低咗Eminem同RobbieWilliams等對手，奪得「全年最佳國際男歌手」，佢喺台上演唱時引起女fans瘋狂尖叫；而「全年最佳國際女歌手」由AvrilLavigne奪得。
人氣急升嘅美國樂隊Maroon5當晚除咗憑《ThisLove》一曲奪得「最佳國際歌曲」外，又攞埋「最佳新進國際藝人」，而美國組合BlackEyesPeas嘅《Elephunk》就獲選為「全年最佳大碟」，英國偶像組合Blue則勇奪「最佳國際組合」，而愛爾蘭樂隊U2就獲頒「特別成就大獎」。本來U2樂隊答應上台表演，但主音Bono話：「因為有隊友要照顧患病嘅孩子嚟唔到，所以我哋取消表演環節。」