租約到期,租客就煩,因為業主可能收番層樓,或者大幅加租,到時就大失預算,踢晒腳。沙田第一城,有個租客見業主勁加租,最後選擇轉租為買,一勞永逸。
個租客原本住五座九百八十呎單位,月租萬一,但業主話,要加兩成半,到一萬三千八。佢諗過搵其他租盤,但經代理游說,話供抵過租,最後用三百六十二萬,買入第四座九百八十呎單位,每呎近三千七,高市價五巴仙。
利記周德龍話,因為有裝修,造價高市價少少。以按七成、供二十五年計,月供只不過一萬一千幾,同加租前嘅租值相若。
聽講,買家九八年賣出第一城五百六十呎單位後,一直租樓,因為小朋友喺區內讀書,唔想搬走,決定買番樓。
周德龍話,呢類大單位,每年租約期滿時,都有部份租客諗吓轉租為買,背後原因,原來都係同小朋友近返學有關。
澳門樓市近年急速升溫,樓價短時間內大幅攀升,情況同十幾年前香港一樣。聽講,過去一啲喺橫街窄巷,冇人問津嘅舖位,都變成搶手貨,投資者畀到嘅價錢,係個業主做十幾二十年生意都未必賺到咁多,部份業主更選擇執咗間舖,收錢為上。
美記澳門分行經理曾樹榮話,最近錄得三宗業主結業賣舖,咁啱都係做茶餐廳。好似高士德大馬路茶餐廳,千五呎,以逾千八萬易手。間嘢做咗十幾年,當年買入價係六十萬,勁賺三十倍,即近千八萬。
另外,板樟堂內街兩間做咗十幾年嘅茶餐廳,同樣因為有投資者高價收購,業主結業套現,其中一間九百幾呎,作價四百八十萬,另一間千一呎,賣六百八十萬。板樟堂喺議事亭前地,遊客雲集嘅旺區附近。
呢幾間茶餐廳,老闆相信發夢都估唔到,自己間舖原來咁值錢,賣咗之後夠晒退休有餘。
九龍塘屋地成交頻密,單係施他佛道,近月就賣咗三間,最新係三號,四千萬成交,呎價逾萬二。
美記話,間屋係戰前樓,原本改咗做老人院,交吉出售,業主十六年前九百萬買入,約賺三倍半。
間屋雖舊,兼做過老人院,銀行照做按。
舊年九月,行遠幾步嘅施他佛道十三號,同樣係老人院,差唔多大,賣三千五萬。
不過,比起再遠啲嘅十九號正式住宅,舊年十月以逾四千二萬成交,老人院就確係抵買啲。
呢兩個禮拜,兩大代理集團共四行,先後舉行周年晚宴,趁機同友好聯誼一番,傳媒係獲邀對象之一,但記者因為工作關係,好難一早到,各報截稿時間又唔同,去得到已經係中段或尾聲。
蘭西聽利記何紹章講,為咗唔想記者畀面嚟到,冇嘢食,或者只係得番啲凍晒嘅食物,佢哋同會展講掂數,特別安排自助餐畀傳媒。
咁樣,無論記者幾時嚟到,都唔怕冇嘢食。聽講,中記今個禮拜三嘅周年晚宴都會咁做。
南亞海嘯引發嘅災難,過咗近一個月,但港人捐助熱情未減。
港置取消周年晚宴原定嘅抽獎,上周將十一萬獎金獎品捐出。另內部籌款所得十萬四千,日前交畀香港紅十字會。為鼓勵員工捐款而設嘅「善心大獎」,結果由執董李志成,同助董楊彩鳳獲獎,兩人各捐五千。
講開做善事,地鐵九龍灣德福廣場同青衣城商場,連續第四年,為公益金籌款,今年以「公益慈善遊樂園」做裝飾同節目主題。兩個場都設「公益慈善大笪地」,有風車轉大運外,重有小食同懷舊食物賣,好似叮叮糖、龍鬚糖等。
電郵地址: