04年，以8.6mm厚度勇奪全球最薄手機之名的NECN900，震撼全球手機界，前無古「機」之餘，暫時亦未有來者。事隔大半年，NEC仍然醉心於其纖薄世界當中，日前再推出其第二代N923，照舊其超薄身形之外（9.6mm），操作上更作出大幅度改變，不但有重新編排的按鈕，最重要就係唔使再黐住個Hands-free做人，拎起就講得！
記者、攝影：劉耀祥 ImageGirl：Echo
Profile
制式：GSM900/1800（雙頻）
顯示器：6萬5色/128×160像素
鏡頭：30萬像素CMOS
記憶體：2MB
功能：64和弦、MMS、GPRS、拍片
備用時間：120小時
通話時間：2小時
體積：85×54×9.6mm
重量：70g
雖然前作N900，以驚為天人的8.6mm機身厚度出場，為全球手機體積帶來一個全新的標準，可惜太着重機身體積的關係，於N900身上，亦都出現操作不便、電池備用時間太短等問題，之但係最大問題就係必須使用Hands-free通話，令不少有心人卻步。而今次N923的推出，最開心就係加入超薄設計嘅聽筒，用家終於可以飛甩Hands-free，以「正常」方式通話。雖然可以拎住手機傾餐飽，不過亦都有「挑剔」嘅地方，就係聽筒位擺放位置有少少奇怪，並唔係喺正中間位置，而係喺機角位置，講電話嘅時候就要「斜斜哋」放部機，怪就怪咗啲，之但係總好過吓吓黐住個Hands-free吖！
雙鞋盒 超巨裝潢
講完外形同功能，重有咩要講？就係個包裝，相信每個人睇見都一定會「嘩」一聲，因為N923機身細細，但係包裝卻大得驚人，差唔多兩個鞋盒咁大，內藏手機、耳筒、火牛等基本裝備之外，更有個超豪皮包，皮包內有埋手機套，嫌皮套太大嘅話，亦都可以單獨用手機套，要豪定要輕巧悉隨尊便！
按鈕變陣更好㩒
驟眼睇N923同N900基本上一式一樣，其實N923比起N900厚咗1mm，不過唔講嘅話，拎上手都未必會發覺。而外形上，最明顯就係按鈕設計唔同咗，不過呢個少少嘅「唔同咗」，就改得非常之好。因為之前N900以數字掣兼埋做十字方向掣，操作繁複之餘，按鈕感覺亦表現一般，之但係今次N923就將十字掣搬往下方，完全同數字掣「分家」，操作更得心應手，感覺更似一般手機。而N923機背亦都不可不提，N900嘅一身數碼相機Look，已經贏得唔少稱讚，N923更作出「FineTune」，將鏡頭稍稍往下移，影相就唔怕俾手指遮住啦！
1.8吋芒大色靚
N923唔單止要大家將注意力集中喺佢「身材」之上，內涵亦都唔可以睇小。內置1.8吋6萬5色彩芒，解像度達128×160像素，表現非常出色，尤其影相時，雖然只係30萬像素，不過畫面清晰兼且顏色鮮豔。
拍片時亦令人驚喜，將部機邊「Fing」、邊拍，反應依然流暢，完全冇窒窒吓，就算重播亦都一樣，處理器絕對功不可沒。而其他功能則有字典、64和弦、MMS及GPRS等大路規格，絕對期望下一代可配備百萬像素鏡頭！
全新世界
查詢電話：27872282
纖薄機有平又有貴
纖薄機身唔一定要幾千蚊先有得玩，其實平平哋都可以一嘗「輕薄」之樂趣，當然要豪亦都有，總之平有平玩，貴有貴玩！
PanasonicX200異常「黑薄」
纖薄型嘅手機雖然機身薄薄，不過價錢就唔係普羅大眾玩得起，好彩Panasonic就為一般用家着想，趁機推出中檔價錢嘅X200。除咗機身輕薄之外，X200嘅設計亦都係明顯花過心思，採用環形天線，比其他手機嘅傳統天線更特別，加埋黑白兩色以供選擇，實屬價廉物美之選。
規格︰GSM雙頻、6萬5色彩芒、16和弦、31萬像素鏡頭、紅外線、MMS、JAVA、GPRS
體積︰104×45×12.9mm
重量︰79g
MotorolaV3「皮」薄「涵」靚
一推出已經惹來唔少用家垂青，價錢至今仍然高企，當然係因為佢夠「薄皮」。同NECN923相比，機身有13.9mm嘅V3略嫌「太厚」，但係在摺機手機界中，V3卻足已雄霸天下。此外，V3具備特大螢幕，睇片亦毫不遜色，再配上MP3鈴聲，無論是AV迷、潮友定係上班一族，都會被其打動芳心。
規格︰GSM四頻、26萬色內芒、30萬像素鏡頭、MP3鈴聲、藍芽、24和弦、JAVA、GPRS
體積︰98×53×13.9mm
重量︰95g
查詢：
數碼通（22818888）