趙紫陽逝世，葡日美加幾個大國都先後發表官方聲明，高度讚揚呢位中國改革開放嘅先鋒有道德勇氣，敢於承擔，係天安門廣場真正英雄之一。雖然佢哋明知咁做中國會唔高興，但係都唔理得咁多，你估個個都好似范太咁，話趙老只係執行政策，冇乜了不起，唔准默哀。
大家掛住鬧中共冇人性，冇人記得當年同中方簽《中英聯合聲明》，將香港交番畀共產黨嘅英國政府，好似由趙紫陽死嗰日開始，英國朝野都冇乜聲氣（除咗報章社論），人哋前蘇共總書記戈爾巴喬夫夠下咗台啦，亦撰文悼念，咁你英國前首相戴卓爾夫人去咗邊呢？
莫非保守黨簽嘅聲明，工黨唔認帳？定係話經濟利益大過民主自由？因為睇新聞先知道，英國外相施仲宏上個星期喺北京訪問，重同溫家寶簽咗一份《旅遊諒解備忘錄》，畀啲大陸人去英國自由行。唉，咁就收晒聲，真冇腰骨。人哋加國總理馬丁夠去訪問，咪一樣發聲明，其中一個團員肯尼地重去埋趙府致祭㖭。
北京今次對趙紫陽嘅死咁鬼小心處理，怕重演當年周恩來同胡耀邦死後引起嘅震撼，如果又有人上街，場面一定唔易收拾，當然今日嘅民情同社會已經同八九年唔同，中共實在唔使咁驚青。𠵱家個局拉鋸緊，因為有班同趙老好老友嘅元老級人馬重健在，佢哋同趙家始終有一定影響力，唔肯草草收場，所以要睇胡溫點拆招啦。
講番香港，班民主派議員上星期雖然突擊成功，係立法會開會前為趙紫陽默哀一分鐘，但係佢哋仍然好不滿主席范太當日嘅判決，認為要求太高，白鴿黨嘅馬丁李最想范太收回裁決，因為有咗呢次先例，以後好多不在位而死嘅人，立法會都好難喺會內向佢哋致哀，因為范太定條線係鄧小平嘅高度，要有佢咁偉大嘅貢獻嘅人士先至可以默哀，咪好大鑊。
趙紫陽死真係可以話得係一塊照妖鏡，上至國家，下至小政客都冇所遁形，講真當年胡耀邦同趙紫陽確實幫咗唔少老幹部
<