臨近新年，係時候要開始作出全面籌備。過年七件事，第一件事梗係要買個靚全盒，若然你對全盒的印象依然停留於紅色圓形膠盒的話，咁足以證明你已經好Out，事關今時今日全盒款式與設計已超越以上兩種元素，中、西、日、卡通公仔式式俱備，單層、多層任你揀，問你服未？
記者：黃婉冰
攝影：周旭民
Model：Katie
單層全盒設計破格
新一代乜都話要In，傳統大紅大金嘅款式早已被剔出考慮範圍，取而代之係一個個賣相破格嘅新潮全盒。中式、日式、西式，外形大玩Design同Fusion，設計反傳統，一啲都唔娘。
品味推介：紅木雕花手工精細
以紅木製成的中式全盒，盒蓋以人手雕上喻意長壽的鶴，用料講究，雕功精細。盒內的陶瓷製間隔同樣以人手繪上梅花圖案，單是手工已值回票價。
售價：$480(a)
創新富貴柿
論外形獨特，首推這套陶瓷製富貴柿，一大六小共七個富貴柿同時放在轉盤上，賣相突出又夠大堆頭。用來放不同的糖果、賀年食品，款式破格創新。
售價：$198(c)
精緻日式木盒
無需要大堆頭，這款日式全盒，以實木製造，長形設計簡約精緻，每格內有一個陶瓷碟仔，清洗方便，就算平時用來做糖果盒亦可。
售價：$249(c)
最應節：特色雞全盒
這個「雞」全盒乃最應節之選，每隻陶瓷碟都分別畫有彩雞圖案，最特別是全盒配襯上一個木墊及透明膠蓋，外形、賣相大玩反傳統。
售價：$480(f)
「大桔」大利
咁大個桔放喺屋企，真正係「大桔」大利，好意頭之餘賣相又夠突出。陶瓷大桔內裏分為四格，放瓜子、糖果啱啱好，外形同傳統款式截然不同，唔講真係唔知係全盒。
售價：$188(c)
陶瓷全盒大玩Fusion
潮流興Fusion，這款陶瓷製全盒就來個中、西FusionDesign。傳統中式外形間隔襯上陶瓷質料、西式花紋圖案，款式中西合璧，喜歡清雅脫俗的話，這款較合適。
售價：$698(c)
年年有餘瓜子盒
老一輩最緊要講意頭，鯉魚喻意「年年有餘」，買這款金鯉魚最適合不過。金鯉魚下面重鋪滿一個個寫上福字的金元寶，打開鯉魚鰭就可用來放瓜子，得體又意頭十足。
售價：$64(a)
如意大「福」盒
忠於傳統又想有新鮮感，這個方形福字賀年全盒就兩個條件都有齊。盒面有一大個福字，連裏面都用金色百福圖做設計，咁多福夠晒好意頭。
售價：$45(b)
矜貴水晶全盒
水晶全盒見過未？Villeroy&Boch出品的水晶全盒，可以自己揀選四隻不同顏色的水晶碟自行組合。過完年，又可用來做小食碟，又靚又實用。
售價：$1,310(d)
多層設計糖果瓜子分開擺放
用開傳統多格式全盒，有無試過以下經驗，打開全盒先發覺糖果、瓜子全部大走位，果汁糖入面又會夾雜住幾粒瓜子，亂七八糟，真失禮！唔想咁，買個雙層或多層設計嘅全盒，一層層，每格放不同賀年糖果，整齊企理。
木枝鎖頭
日式三層陶瓷全盒，外形有如舊式飯壺，但講到特別，都係全盒蓋頂的設計。木蓋頂以一支類似髮簪的木枝貫穿，要打開就要將木枝拉出，有如鎖頭一樣，設計幾特別。
售價：$298(c)
櫃桶形設計
外形有如一個迷你三桶櫃，櫃頂更附設手挽，可以拎住四圍走招呼朋友。除櫃身以實木做成外，三個櫃桶均以陶瓷製造，而且各自畫上不同的賀年花，畫功精美。
售價：$348(c)
大中細層層叠
日式漆器圖案全盒，提籃形設計，內有大、中、細三個不同大小的全盒，每層都附有獨立盒蓋，可以分開擺放。層層容量都頗高，可以唔使成日補充咁麻煩。
原價：$89.9
特價：$79.9(e)
雙重盒蓋夠保鮮
日式實木雙層全盒，設計原理同保鮮盒一樣，頂層除附有木蓋外，木蓋之下有另一膠蓋，冚得密密實實，存氣保鮮，擺開心果或果仁就最啱。
售價：$420(c)
旋轉「金碟」
賣相雖與一般傳統款差不多，但這款特別在旁邊有一隻葉形設計的金碟，金碟可隨意轉動，用來盛載瓜子，可以方便客人享用。
售價：$33.9(g)
花開富貴糖果盒
想花巧少少，這個畫滿彩色鮮花的三層糖果盒可會是你的首選？又紅又綠的鮮花圖案喻意花開富貴，望見都賞心悅目。
售價：$89.9(g)
Q版招財貓
現代人百無禁忌，黑色全盒反而更顯突出。全盒用陶瓷製造，一個個金元寶加埋隻肥嘟嘟Cute版招財貓，有福又有財，一樣咁好意頭。
售價：$59(c)
清雅繪花陶瓷
陶瓷製三層全盒，表面繪上簡單而工整的鮮花圖案，款式比傳統紅噹噹來得典雅脫俗，繪花圖案細緻，是另一反傳統破格之選。
售價：$278.4(b)
潮人首選：日式八角木盒
後生仔女對傳統款式未必受落，相反簡約設計會更得歡心。好似這款八角形雙層全盒，深啡色實木襯上獨特外形，就連盒內的間格都特別過人。
原價：$368
特價：$294.4(b)
公仔款式大人細路都鍾意
卡通人物有幾吸引？連新年全盒都要出動卡通人物作招徠，就知其吸引力有幾強。同往年一樣，今年除有日本Character大舉出動外，連小朋友至愛嘅PETERRABBIT都有份，大人細路都會鍾意。
外形另類：超罕有PETERRABBIT
唔講你可能唔會知道，其實此乃一個三層全盒，雖然外形同款式好似同新年格格不入，但勝在夠另類，而且PETERRABBIT向來受小朋友歡迎，不妨諗諗。
售價：$168(b)
大口財神
論外形設計可能未及CK鼠咁有風格，但憑住大口仔扮財神爺呢一招，效果搞鬼又得意，相信可挽回不少分數，三層設計，可愛實用兼備。
原價：$70
特價：$48(b)
CK鼠花形全盒
CK鼠今年可以突圍而出成為CoverModel，一身中式賀年扮相當然唔少得，最正係連全盒外形都玩埋花形，款式夠特別。
原價：$298
特價：$128(b)
HelloKitty櫻花盒
HelloKitty迷唔使諗，這個櫻花形三層全盒依然是首選。櫻花外形，加埋HelloKitty個嘜頭，款式雖然簡單，但足以令Fans們愛不釋手。
售價：$210(h)
店舖資料
(a) 裕華國貨 23840084 佐敦彌敦道301-309號
(b) 西田百貨 26941111 沙田新城市廣場3期2樓
(c) 崇光百貨 28338338 銅鑼灣軒尼詩道555號7樓家品部
(d) Villeroy&Boch 28314636 銅鑼灣軒尼詩道555號7樓
(e) 實惠 26638833 旺角彌敦道610號荷李活廣場一樓全層
(f) Choice 23428923 觀塘開源道73-75號業發工業大廈二期一樓10號舖
(g) 吉之島 28846888 鰂魚涌康山道2號康怡廣場南
(h) SanrioVivitix 21561202 銅鑼灣景隆街3號B舖