同唔少娛樂圈中人相熟嘅玲姐，前晚喺中環G-Club舉行生日派對，黎明、劉嘉玲、戴夢夢同陳達志（Ba叔）等都有到賀，咁啱G-Club樓下嗰間喜喜會又舉行時裝派對，城中唔少名人藝人都有出席，其間更有警察到該大廈查牌，一時間搞到中環好鬼熱鬧。而壽星女玲姐離開時唔單止飲到啤啤夫，要人扶住離開，重因為條裙太短而唔小心走光㖭！
另一方面，前晚大約十一點幾，馮仁昭見到黃家諾同朋友一齊去喜喜會出席時裝派對，咁啱黃家諾嘅舊愛關之琳亦喺差唔多時間去咗樓上嘅G-Club同玲姐賀壽。Ba叔凌晨三點幾離開G-Club嘅時候爆響口話：「關之琳都有去，飲到醉醉哋，佢唞一唞先走，冇乜嘢嘅。」關之琳同黃家諾呢對過氣情侶雖然喺同一幢大廈出現，但一個喺樓上，一個喺樓下，大家始終都無緣相見！
蔡依林（Jolin）今個月二十九日會同任賢齊為台灣金融公司做尾禡演出，酬勞有成六十幾萬港紙，但Jolin曾經話過冇興趣演出，重話：「自己在台上唱歌、台下在吃飯聊天，有些不適應！」但係酬勞咁吸引，佢嘅經理人承認已經接咗呢個演出，重話Jolin好開心，感覺好似中咗六合彩咁喎！
鍾嘉欣噚日喺奧海城出席「百鳥朝鳳迎新歲」活動，佢透露喺下月開拍嘅新劇《隨時候命》中飾演空中服務員，同鄭伊健大做對手戲，日前嘉欣特別到飛行服務中心視察。另外，佢會擔任《華姐》選舉嘅嘉賓，佢話最睇好香港代表徐子珊。
羅兆輝日前喺澳門涉嫌販毒被捕，薛家燕（好姨）前日就話雖然唔識佢，不過見佢呢幾年大上大落，都好感慨，好姨話：「好多時太年輕突然暴發成功，遇到問題就會好似骨牌效應咁冧晒，之前又話佢生毒瘡，再加上咁多負面新聞，對佢影響都好大。」
韓國女星金晶銀憑韓劇《巴黎戀人》成為一線女星，重喺韓國連掃九個獎，佢噚日同劇中拍檔朴新陽去台灣宣傳。當年金晶銀曾經喺韓劇《妙手情天》中飾演精神病患者，原本導演安排女主角金喜善剃光頭演出，但金喜善擔心破壞形象，最後改由當時冇乜名氣嘅金晶銀剃頭演出，佢咁專業，抵佢𠵱家咁紅！
顧紀筠噚日去尖沙嘴出席活動，佢話四月同無綫滿約，已經決定唔續約，專心做義工，佢重會去四百幾間中學同大學擔任演講嘉賓，講解青少年同父母之間嘅溝通問題，身為兩子之母嘅顧老闆話自己喺呢方面都有啲心得，希望對現今嘅父母同青少年起鼓舞作用。
