努力係唔一定有回報嘅，呢句說話，相信小小超李澤楷呢期體會最深。電盈八號仔撲足一年，排除萬難，上個禮拜終於搞掂網通入股單交易。對方出到每股現金五個九買入兩成股份（市價不過四個七），又肯同電盈合作拓展中國市場，好多外商恨到流口水，但八號仔復牌一樣要跌，重跌到十六個月新低㖭。
冇法啦，小股東以前傷得太深，好難恢復信心。小小超惟有繼續努力。八方上個禮拜見到佢，發覺佢肥咗，唔通好得閒？佢當然否認──禮拜三下晝飛上北京，夜晚在網通簽約，跟住慶功宴，然後又搞通告，翌日早機飛返港，中午又食公務飯，跟住又準備見傳媒……之所以肥，係因為連運動時間都冇埋。
電盈董事總經理蘇澤光亦一樣咁頻撲，上周四晚同佢食晚飯，見佢攰到講唔出嘢；打工皇帝，真唔易做。
傳真︰2623-9278
電郵︰