八方星期日寫咗篇TVB摺埋澳門新聞站古仔，估唔到引來投訴，唔係投訴《蘋果》，而係投訴TVB為節省成本，令新聞質素不斷下降。例如早晨節目，報道台灣有個細路特別高，中國有隻熊貓唔食飯，又或者在北京拍落雪，市民在堆雪人。個投訴人T君問無綫知唔知每日來往京港航班有幾多班？北京市民堆雪人係乜嘢新聞？佢話知道TVB連澳門新聞都放棄時，忍無可忍，所以整咗封信去廣管局，八方收到副本，相信無綫公關部亦收到一份。
八方其實好同情無綫新聞部，要做好新聞，一定要有資源，上頭閂水喉，根本冇得做，加上裁員令士氣大損，唔係播熊貓你話播乜？不過，禮拜六《南華早報》話無綫個二十四小時新聞台，即係銀河，今個禮拜會同和黃簽約用和黃個網絡播，咁就一天都光晒，第日有水到，咪可以做番好啲囉。
傳真︰2623-9278
電郵︰