無國界醫生噚日舉辦一年一度嘅野外定向比賽，呢個人道救援組織喺南亞海嘯落力救人，噚日搞活動就自然一呼百應，醫管局行政總裁何兆煒、民主黨黨魁李永達、民建聯前主席曾鈺成都畀面參加名人邀請賽。咁多位名人當中，何兆煒嘅仔仔Ryan何宇深成為全場焦點，十二歲嘅Ryan話自己最鍾意讀書同打online game，間中都有同爸爸打tennis，兩父子邊個球技好啲？Ryan好鬼馬咁話：「佢（何兆煒）邊識打？」兩父子都係第一次玩野外定向，出發時何兆煒就笑笑口話平時個仔重忙過佢。
開賽前阿達自爆朝早去錯地方，要搭成三十幾蚊的士先嚟到會場，俾曾鈺成寸佢行錯路點帶領民主黨。一輪牙骱戰過後，比賽由民建聯後生黨員組成嘅「活力建港隊」得第一，曾鈺成呢班民建聯老將組成嘅「真誠建港隊」拎第二，阿達同馬丁等人合組嘅「愛心無國界組」三甲不入。
（圖）李永達（右）搭錯車俾曾鈺成寸佢冇能力帶領民主黨，真係服咗佢啲想像力。
傳真︰2623-9278
電郵︰