公益金今個財政年度至今籌款不足，到三月底之前，重要拚命籌多五千萬元，先至達到目標；即使達標，都係一億五千幾萬，比上個年度籌到嘅一億八千萬，仍然相差十七巴仙。相反，香港人捐款賑災，援助南亞海嘯災民，三個星期內就捐足七億有多。你話香港人唔肯捐錢？非也，只不過覺得年年捐畀公益金，覺得冇乜新意，所以興趣不大而已。
財經專欄大作家最近捐款五千大元畀一個癌症基金，有關機構千多萬謝，幾乎感激涕零，事關該機構最近籌款籌得好辛苦，大作家算係雪中送炭。大作家話：「儒家講推己及人，賑災固然好好，香港人都好需要幫忙啫，做人切忌照遠唔照近。」
「壹仔」宗菁華話，公益金籌款不足，可以賴公益金公關委員會主席彭美拉。大作家話：「賴得就賴，搵邊個做公關，都唔掂啦。」彭美拉四處呼冤，佢話宗菁華講消委會都算啦，你鍾意點批評都有自由，但講到佢十多年都唔同鄰居打招呼，就係人身攻擊，與事實完全不符，事關清潔阿嬸都同佢有偈傾，自己點會大鼻到唔同鄰居打招呼？
大作家原來係彭美拉同住「摩天大廈」（喺天后廟道雲景道，並非宗菁華所講嘅炮台山），大作家住喺樓上。彭美拉嘅夫君係大廈業主委員會委員，唔少人識佢。大作家話彭美拉為人verynice，唔係「壹仔」宗菁華講嗰類天生就唔鍾意公關之人，佢話宗菁華或者另有source，但佢以親身經驗作證，彭美拉係好好人！
羅生門何其多也，睇讀者信邊個。至於話消委會拆散銀行公會之利率協議，令一眾賓架不滿。當然係冇錯。我哋睇楊懷康社長經濟文章睇得多，就知道自由市場之可愛，消委會嘅做法，好啱楊社長之笛啫。