為受南亞海嘯影響的災民，香港市民出錢出力，九間大專院校亦不咁後人，同一間雜誌社合作，噚日喺城大搞義賣同演唱會（圖），搵咗張衛健同女生宿舍等藝人及歌星嚟表演，總共有二百幾人出席，重有好多嘢義賣，希望籌到五、六萬蚊善款捐畀宣明會用嚟賑災。
而車公係瘟疫剋星，沙田區就特別揀喺車公廟前面嘅足球場，舉辦「南亞海嘯災區重建——傷健同心獻溫情」義賣籌款活動。主辦單位話，海嘯過後災民已經夠慘，唔想災區再爆發瘟疫，喺籌款活動前默哀咗一分鐘，悼念死難災民之餘，又祈求車公保佑南亞，唔好爆發瘟疫。
年近歲晚，適逢賽馬日，唔少市民同賭仔都會向車公酬神同求財。主辦單位搵人扮「財神」，喺車公廟前賣「金元寶」籌款，果然吸引唔少人捐錢。
傳真︰2623-9278
電郵︰