巴西來港賀歲，難得可以現場睇吓世界足球先生朗拿甸奴獻技。前晚西甲聯睇巴塞對桑坦德，每見「細哨」俾對方圍剿，我求大俠都戥佢擔心，希望佢錫吓身，咪喺呢個時候受傷，搞到嚟唔到香港就可惜嘞。
朗拿甸奴喺呢場大勝對方三比○嘅聯賽中，仍然保持其一貫鍾意上腳玩波嘅娛樂性踢法；結果不下一次見到起碼有兩、三個對方球員同時間走埋去，想以超技術踢低「細哨」。好彩「細哨」每次都避得過無乜受傷迹象，但再咁落去，香港球迷都咪話唔擔心。
另外，呢場波「細哨」射入一球，呢球亦係佢喺今季聯賽第一個並非來自主射十二碼嘅入球，當時咁啱隊長佩奧爾罕有地被調出，由「細哨」戴上隊長臂章。唔通佢要做隊長至識入波？
郝海東話二月初就會去英國投效錫菲聯，佢講到對球員喺比賽中打架嘅睇法，就嚟三張五嘅「郝董」話踢波想冇衝突就不如留喺屋企。問到若喺英格蘭聯賽被人打會點？佢就話「緊係還手啦！」認真老馬有火！不過我求驗客勸佢一句，大不列顛始終係人哋嘅地方，凡事都忍吓！
車路士贏波冠軍賠率再輕微升溫到一點一三倍，領隊摩連奴照例無出席賽後記招，但助教奇勒一樣大口氣，重定下目標再贏多十一場。我求大俠查過，車仔到四月先喺聯賽連撼曼聯同阿仙奴，嚟緊嘅對手最強得跌緊嘅愛華頓，想睇車仔輸波，怕且到歐冠盃大戰巴塞隆拿先有機會嘞。
聖誕期間贏咗世界自由球大賽嘅海倫芬中場爾迪林，佢有荷蘭同土耳其雙重國籍，喺上周六海倫芬贏咗丹保殊嘅荷甲聯後，決定代表荷蘭國家隊。呢個消息令荷蘭國家隊教練尹巴士頓好開心，話喺二月九日對英格蘭嘅友賽會選佢入隊。嘩！荷蘭有埋呢個死球專家，咪如虎添翼？
今季重有成四個月先至完，修咸頓已經為下季喺官方網提供四種球衣款式，畀球迷選擇下季主場波衫。我求大俠睇清楚，款式離唔開傳統紅白間，改動嘅只係背面球衣號碼位，都算騎呢。但修咸頓球迷最唔想件波衫有改動嘅肯定係臂位個襟章由英超聯改做英冠聯嘞；點解？驚降班咯！