Smart為ABathingApe最近出咗本賣到開巷嘅全彩色特集，介紹05年新貨，880日圓（約港紙$70），隨書送猿顏貼紙及迷彩墊布，銅鑼灣三越百貨間日本書店同怡東酒店附近間「日本快線」率先將呢本書即時加價至$180，升幅達100%。反觀崇光「旭屋」書店同尖沙嘴「智源」一如過往只賣11算，約$97。
水貨大亨話喺日本一般嘅書店或便利店都有得賣呢本書，照賣原價880日圓加稅，以炒價售賣的就只有賣裏原宿嘢的炒舖。
三越間書店同「日本快線」唔屬於炒舖，唔知點解要賣貴成倍？難免有趁火打劫之嫌，話晒佢哋係全港三大日本雜誌批發商之一，無理加價有違公平原則；如果呢件事發生喺美國，相信佢哋已被人告到甩褲。
同樣情況，美國Apple新推出嘅iPodshuffle，今個禮拜抵港，一如以往，第一水返貨唔多，短期內肯定供不應求。所以早有食腦一族已走上銅鑼灣皇室堡，向電腦店開出盤口：「每部iPodShuffle門口價加$70，要求食起成批貨」，打算放喺二手炒賣巿場賺一鋪。可能電腦店班Sales賣慣美國嘢，做生意手法都有點美國人風格：「No！No！No！咁做法對其他客唔Fair喇！總之我哋照賣SuggestRetailPrice$1,170（1GB），你有本事就搵人嚟排隊掃走晒佢，要我扣起批貨轉售就唔得喇！我哋做生意要睇遠，點會咁短視㗎！」此話甚有理。
主持人：大食Jack
八卦熱報：[email protected]
