銀行界高層調動，本是常事，但以最新調動情況嚟睇，本地高級資深賓架甚為吃香。自從滙豐宣布鄭海泉任香港滙豐大班，聘任王冬勝為執行董事後，花旗喺台灣調陳子政返嚟，渣打又宣布擢升曾璟璇（KatherineTsang）為中國區總裁，代替原來嘅麥天輝（MartinFish）。為咗中國市場，本地人突然有大把機會，可喜可賀。
賓架陳睇見曾璟璇升級，突有感觸。賓架陳話：「兩年前渣打黃遠輝駐上海，任中國區總裁，聽講王冬勝與佢冇乜溝通；黃遠輝呢位資深賓架，熟悉國情人士竟然退休回港。繼任佢嘅，好funny，竟係一位略識普通話，唔熟中國嘅洋人MartinFish。呢，做咗唔算耐，現在由原本係做培訓工作嘅曾景璇接棒。曾小姐究竟做過中國業務未？做過銀行貸款工作未？對中國是否有深厚認識？渣打以外嘅人唔多知。呢啲調動真奇怪！」
言下之意，賓架陳係為黃遠輝唔抵。做中國業務嘅第一代銀行家（即一九七八年至一九八五年開始已到中國開荒嘅銀行界人士），現在仍未到退休年齡，最多五十零歲，唔知去晒邊呢？唔通全部退晒休？想當年佢哋到廣州，只得一間東方賓館可住，到北京開辦事處，要到釣魚台賓館捱貴租，後來幾乎齊集喺建國飯店，到上海只有錦江賓館舊館，同𠵱家啲享受法差得遠咯。可惜吖，牛耕田，馬食穀，福地後人耕，只恨入行早人十八年。打工要講時也命也，素來只有時勢造英雄，絕少英雄造時勢，新紮師兄師姐可以一朝時來風送滕王閣，理得你幾資深，幾有經驗吖。