憑韓劇《冬日戀曲》而迷倒無數日本師奶嘅韓國男星裴勇俊，佢所屬嘅日本事務所下月一號，會喺日本推出首批俊哥精品。呢批精品當中，就會以cute到爆嘅bearbear熊嚟打頭陣。呢隻名為「JoonBear」（俊Bear）嘅熊仔抄足俊哥喺《冬》劇裏面嘅造型，睇嚟又會引起日本師奶爭相搶購熊仔嘅熱潮。
據知俊Bear只係限量推出五千隻，定價為二萬九千八百日圓（約二千二百港元）。雖然隻嘢咁貴，但係每隻俊Bear都係百分百人手製造，除髮型跟足俊哥《冬》劇嘅金髦李民亨造型之外，重戴埋俊哥嘅招牌頸巾同眼鏡，相信日本女fans實話物超所值。而每隻俊bear腳上都繡咗俊哥嘅簽名，耳仔度又縫咗出廠號碼，淨係收藏都抵啦！
據知一號俊Bear已被俊哥據為己有，而其餘印有特別數字，包括俊哥生日日期（0829）、首次訪日日期（0404）、寫真集發售日期（1126）等四十五隻特別號碼俊Bear，就會攞嚟作抽獎之用。
俊Bear已經開始接受網上訂購，相信唔少師奶已經爭先搶購。