新世界發展（017）上年11月24日創出一年高位見9.25元，呢兩個月倒水，眨吓眼跌咗兩成過外，再跌抵搞。
新世界揸住投資物業，求其抽一兩件，好似新世界中心、會展中心，全部筍嘢，所控香港投資物業樓面達到832萬平方呎，規模同上市流產嘅領匯（1000萬平方呎）有得揮。
領匯資產估值300億元，畀人話賤賣；新世界超筍投資物業，04年度估值，都係得220億元，相比之下，已經價殘。再講，現價又相對每股資產值15.4元折讓53%，係兩個殘（殘上加殘）。
新世界04年度因為要攤佔新信息（301）24億元非現金性投資撥備，業績見紅，外資大孖沙呱呱嘈；呢期投資物業大有重估增值潛力，兼且受惠新會計制，資產重估若然有升值，本年度業績隨時有驚喜。趁冇乜先知先覺報告出街，呢轉以最近半年密集區6.5元為限，逢低收集，等創一年新高。
金朝陽（878）本月12日先舊後新，配售1000萬股，配售前股價2.875元，伸手價2.7元水位，再跌近2.2元，又可撈底。例牌講兩點。第一，金朝陽揸住羅素街金朝陽中心，估值超過24億元，份屬優質，所以，就算得一家大型收租物業咁大把，個底厚，都足秤，現價資產折讓75%。
第二，集團持有元朗、馬鞍山及西貢，樓面20萬平方呎地皮，呢期有聲氣話計劃興建低密度住宅。03年沙士期，集團曾經諗過以1000萬元，賤賣其中元朗地皮，好彩最後無行動，皆因以上住宅項目，家陣估計純利可達3億元。
錢雋