對大部份學院派嘅人嚟講，電影可以分開兩種。一種叫商業片，另一種叫藝術片。經常有人問我同一個問題：「你有冇諗過拍啲藝術成份高啲嘅電影呢？」我好想答：「我梗係有諗過啦，不知幾想，但係唔識拍啫。我重諗過好藝術性地暗寸番你，或者好有商業價值地打鑊你㖭。」其實我真係唔識答呢個問題，因為我對電影嘅睇法唔係咁。所以我通常都係笑完就算，但係我就好有興趣研究點解佢哋會問啲咁嘅問題。
首先我覺得問呢類問題嘅人一定覺得自己好型，但係每一次我反問佢哋鍾意睇邊套藝術電影又或者覺得邊套電影嘅藝術成份較高，就個個都啞口無言，間中有一兩個會答你：「王家衞啲戲啦。」或者「張藝謀啲戲啦。」對唔住，我真係唔認同，我覺得王家衞同張藝謀兩個都係一流嘅商業導演，喺題材選擇上佢兩個一定會揀一個最有價值，商業回報最高嘅類型，亦都能夠將呢個類型嘅電影喺藝術上處理得好好，但係就唔係藝術片囉。所以嗰啲覺得自己好型嘅人其實只係顯示一種態度，又或者以為有女望住問個好有品味嘅問題先！另外一種問題嘅人態度上係覺得藝術片至係電影，商業片唔係。呢類人就應該去睇心理醫生，因為佢如果唔係有好多壓抑就應該係壞咗腦。等如我話：「白人至係人，黑人唔係。」咁你話有冇問題呀？
所以請大家簡單啲去睇電影，教電影，評論電影。因為對大部份觀眾嚟講，電影只係分開兩種，一種叫做好睇，另一種叫做唔好睇。