容祖兒去年九月宣布與拍拖兩年的圈外「隱形男友」分手後，至今未有新戀情，她形容自己愛情「乾塘」，祖兒說：「之前嗰段情過去咗，要搵新對象好難，做呢行嘅對方見到我都有少少驚，驚我忙啦，唔會有普通男仔想同你拍拖，二來拍拖又唔可以咁光明正大，要匿埋喺屋企，唔係正常嘅戀愛，所以人哋未必會選擇你。」
祖兒入行以來緋聞不多，她笑言可能被人斬斷了桃花樹，祖兒笑說：「係咪我唔靚呢？我都算係最dry（乾涸）女星，不過我又唔會亂畀訊號人哋，男仔傾多兩句，我會向後行，冇緋聞同自己幅牆都有關係。」
娛圈不乏俊男美女，可是祖兒揚言不會選擇與圈中人拍拖，因為男星實在令她欠缺安全感，祖兒說：「我唔會憧憬同圈內人拍拖，始終大家嘅圈子咁忙，圈內人會有太多引誘，我係一個需要安全感嘅女仔，唔想成日提心吊膽。我曾經問過高人，問可唔可以搵個好老公？高人話我咁黐筋嘅性格，要搵個低能嘅至得。其實我唔恨拍拖，我一個人都得，OK喎，我性格幾man㗎！霆鋒、馮德倫都唔當我係女仔嘅，感情嘅嘢，隨緣啦，我又唔恨。」
容祖兒年前飽受喉嚨聲沙困擾，雖然已經好轉，但其聲帶狀態至今仍不穩定，有如計時炸彈一樣，故此她平日要盡量小心保養聲線。奈何早前祖兒與朋友唱卡拉OK時，再次觸發聲帶舊患，結果又要看醫生。
祖兒說：「一路以嚟令我情緒最易波動、最大壓力嘅係錄音。我𠵱家錄緊碟，有日同朋友去唱卡拉OK，我冇乜點唱歌，但喺嗰個太嘈嘅環境下，講嘢要好大聲，第二日我把聲就好虛，即刻要去睇醫生。我條命整定要乖乖哋，唔好咁緊張，要好小心保護把聲，做完嘢就要返屋企。」
祖兒承認目前要極小心保護聲帶，她笑說：「我有一條容易受傷嘅喉嚨，我靠聲帶工作，但聲帶好易倦，我知有外國歌手喺開演唱會之前，會用紙筆墨硯同佢老公溝通，我覺得呢個方法好喎，因為我講嘢忍唔住興奮，鍾意尖叫，Mani（經理人霍汶希）見我講得最多嘅係『唔好嘈』。」
祖兒續說：「我由○一年開始聲沙，把聲間間斷斷會倦，以前我覺得係世界末日，𠵱家我明白呢啲係身體狀況，會同公司講唔好畀咁多嘢我做，我個人頂得順，但喉嚨頂唔順。我媽咪已經整咗個人品牌嘅飲品，我日日都拎住個阿媽畀我嘅核突水壺，入面有無花果、南北杏之類。不過我今年會繼續喺香港學唱歌，開拓喉嚨另外一啲組織，試吓用唔同位置嚟唱。」
採訪：朱倬誼 攝影：陳志嵐 髮型：HeidieMok@HipHairCulture
場地：岳飛餐室（尖沙嘴）