做人處世的道理，人人都識講，齋談好輕鬆，但知難行易。前英國陸軍高級教官康偉佳（Benson），97回歸後退下火線，在掃管笏重操故業執教鞭，但今次教的不是軍事策略，學員也不是軍人同袍，而是普羅大眾如你我，如何透過各式戶外活動，鍛煉自信、責任感，學懂與人溝通，建立人際關係。
記者：尹珊珊 攝影：楊錦文
野孩子從軍當兵
據介紹人同事甲講，Benson好爬得，果然是，甫見面，他已在有三層樓高的斜坡上等我們。「呢個斜坡好濕碎啫。」我心忖：「個斜坡咁高咁直，都叫濕碎？」一到頂，重驚！可憐攝影師要就角度取景拍攝，被迫跟Benson游繩下降，「唔使怕，有安全繩扣住，無事喎！」在他拍心口保證後，攝影師面青青踏出第一步，以為影完相就搞掂，No，Benson見我畏高，淨係識企埋側邊陰陰嘴笑，即來個突擊測試：「畏高可以克服，你試吓徒步行上頂，慢慢行一定得。」死撐，勉強成功，好開心。
皮膚黝黑、身材結實的他咁識教人，只因早年是軍校教官。他在牛頭角徙置區長大，自幼愛通街跑，「以前個年代無電腦、無遊戲機，連籃球場都唔多，自己屋企細，一家八口屈喺兩百呎屋仔，梗係要出街舒展吓，細個最鍾意同朋友行半個鐘落雞寮踢波。」1979年，Benson中五畢業，見朋友仔投考華籍英軍，便本着一試無妨的心態陪考，「自己無咩想做，諗住當兵玩幾年，點知做做吓由18歲一直做到97年回歸。」童年時代習慣刻苦生活，加上一身好體能，他比其他人容易適應軍人生活，「當兵好辛苦，大熱天時又要跑圈、跑山，熱到底褲都濕埋，曾經諗過放棄，但我覺得環境能磨練自己，點辛苦都要捱落去。」
神槍手獲英女皇接見
接近18年從軍生涯，Benson首四年負責運輸工作，到1984年被上級調往學堂做教官，「做教官唔係有經驗就得，好講專業資格，所以要邊做邊深造，85年飛過英國軍校考軍操及輕型武器教練兩個認可資格，之後每隔一段時間要出外特訓。」說到最難忘一役，首推86年遠赴汶萊受訓，「去汶萊熱帶雨林學森林戰術，同行重有新加坡兵、馬拉兵、啹喀同鬼佬，每日大家都要揹往70磅嘢通山走，又要適應當地氣候，最慘係一個月先準沖一次涼，刷牙都唔畀刷，唔慌唔甘。」當兵辛苦係人都知，但嚴到刷牙沖涼都唔準就奇怪啲喎，何解？「因為喺森林容易有細菌感染，刷牙唔小心刷出血，咁就中招，有個中國人就因為細菌感染，上堂中途要用直升機送去醫院。」
Benson在軍隊解散前，已晉升至高級教官，即相等於警察部的二粒一辦，但最令他自豪的並非軍階，而是自84年開始入選為香港陸軍射擊代表隊，曾參加了11年全英燒槍比賽。「頭幾年經驗唔夠，唔熟比賽方式，人哋梗係睇唔起我哋班蝦兵蟹將，到88、89年開始漸入佳境，記得93年適逢比賽一百周年慶典，我哋贏咗小型部隊冠軍，除咗獲英女皇頒獎，我重代表小隊同佢食飯。」與英女皇同進午餐只是虛榮，對槍手來說，最大榮譽是入選ArmyHundred一員，即二十多萬英軍中成績最好的頭一百名，他更厲害，曾兩度成為ArmyEight，「唔止陸軍，講緊係全BritishRegularArmy中最好嗰八個，當然係極大榮耀，唔開心就假。」
親身經驗猶勝理論
97年因政局問題，Benson變相提早退休，遂聯同昔日戰友合作開辦啟能訓練中心，「做咗咁多年考官，都好想將自己識嘅嘢套用喺現實生活，一開始主要做WarGame場，後來再將山藝、野外求生等元素加埋落去。」續執教鞭，學員由昔日的軍人同袍，轉變成中小學生、政府部門員工甚至是大公司職員，「合作性、人際關係、責任感呢類理論大家都知，但實際點做又係另一回事，用活動形式去表達訊息，親身體驗的感覺係好重要，簡單咁講，畀條繩你，用眼睇同用手摸已經係兩種感覺。」這種名為ExperimentalLearning（體驗式活動）的教學方法，在外國已流行多時，在98年，Benson便曾獲地鐵聘用做機場快線的步操隊教練，「步操唔係話有喜慶日子出來演出咁簡單，大公司講紀律，藉着步操可以訓練到紀律性同團隊精神。」即使在一般人眼中視為緊張刺激的歷奇活動，原來背後也另有一重意義，「香港小朋友淨係識讀書，有啲連隻雞都未見過，透過遊戲同活動可以令佢哋鍛煉到自信、意志、自律同合作性，玩完講感受，已經係一種學習方法。」
半退休享受新生命
現時訓練中心已踏上軌道，教學有一班專業教練負責，Benson主要擔任行政工作，半退休：「始終體能無後生咁好，以前揹幾重嘢通山跑都得，𠵱家退居後線，得閒行山睇風景，自己又好鍾意大自然，咪搞吓花花草草，真真正正享受生活。」這個昔日取得最高榮譽的神槍手，也礙於開支太貴已放棄玩燒槍，「喺香港玩槍係有錢人活動，以前練槍一日閒閒哋射兩三千發子彈，逐粒計認真和味。」
他所謂的半退休生活，其實比一般人忙碌，他現時除了為城大專業進修學院的「歷奇教育導師持續教育證書課程」擔任教官外，還不時為社區中心、私人機構、政府部門等舉辦訓練，訪問翌日又要過澳門，籌備未來在澳門旅遊塔上舉辦的活動，相信離真正退休尚有大段日子。
Benson醫小記畏高
先來示範，雖然三層樓高的斜坡濕碎到爆，但他事先一樣做足安全措施。
小檔案
康偉佳（Benson），45歲，前英國陸軍高級教官，79年加入華籍英軍，97年因政局問題部門解散，夥同戰友於屯門掃管笏村開設啟能訓練中心。他曾受聘於地下鐵路有限公司、建造業訓練局，擔任步操隊教練，備有美國紀律人員槍械教練、英國陸軍軍操教練及輕型武器教練、英國萊福槍會靶場主任等專業資格。
