喺剛剛過去的聖誕黃金檔，想搵套「東方」電影睇，選擇真係少之又少，來來去去都只係得兩套，一是風頭躉的《功夫》，二是今日介紹的《天下無賊》。今個星期非常突然接到《天》試碟喺手，問10個碟迷，都好難相信佢會咁快出3區DVD（身邊朋友有啲重以為我睇緊老翻㖭！）一個簡單賊公賊婆的故事，看似炒雜錦式將驚天奪寶、火車困獸鬥及古式武俠片炒埋一碟，不過難得畫面亮麗，睇到人有血有淚。
記者：朱崇德
平心而論，《天下無賊》相信係一套好多人都錯過咗嘅好戲！儘管上映檔期剛好撞正星爺經年嘔心瀝血之作《功夫》，不過中港票房仍能衝破一億港元大關，實力絕不容忽視。而且新片雙碟價都唔算太貴，嚟緊星期二正式「派街價」$89，相信落到一啲旺區碟舖可能會更平，值得撐！
價錢：$89
區碼：3區
片長：113分鐘
發行公司：鉅星錄像發行（香港）有限公司
千勣企業有限公司
區區6萬 火車爭奪戰
故事大綱，講述我哋嘅金像影帝劉華同劉若英，飾演一對偷呃拐騙，無惡不作嘅賊公賊婆。一日賊婆感覺厭倦此種生活，意欲隱退，不過反招為兩人反目嘅導火線。在火車上兩人巧遇贛直民工儍根（王寶強），帶住6萬元儲蓄回鄉。其淳樸性格打動了賊婆，決意沿途保護他，並力阻劉華覬覦他的儲蓄。豈料火車上竟有另一偷竊集團，為首的黎叔（葛優）決意率眾染指這筆款項，賊婆為了不讓儍根得悉真相，惟有見招拆招！劉華亦不甘服輸，亦為了自己的女人而毅然接受挑戰。在貪念與純真之間，雙方在狹窄的車廂中展開一幕幕暗戰。然而車中竟然卧虎藏龍，火車未到站一刻，仍未能分出高下。
鼠竊狗偷 辣身激戰
火車困獸鬥加俠盜偷天的題材，講心嗰句，真係濫到冇人有！不過以小小一民工、區區的6萬蚊為導火線！竟然令各幫高手使盡渾身解數，甚至身陷囹圄都在所不惜，真係非常高章！
此外，在各幫互鬥中，《天》亦非常聰明地加入了中國式武俠的觸感。筆者最喜歡是戲中幾幕在火車廂內的武鬥！武器非常創新地使用了鼠竊狗偷最隨身的工具──刀片！舞蹈式打鬥場面、身貼身的混戰，再加緊密的鏡頭剪接及光影效果，畫面表現絕對賞心悅目，當中尤以劉華同李冰冰「辣身一戰」最令人印象深刻！
另外，劉華同葛優一段餐卡上的「文鬥」──剝雞蛋殼，儘管CG特技真係差幾皮，不過其場面設計，看過此段之人，真係無不津津樂道！
剝雞蛋逐格睇！
餓狼儍羊 蘊含寓意
貪念與純真之爭，可算是本片的大主題。片名雖為《天下無賊》，不過戲中則剛巧相反，處處皆賊。為賊者好多人都喜歡自喻為狼──「狼乎？性貪而狠，黨豺為虐！」，而最不幸者是在這狼群之中，竟然出現了一隻不知天高地厚，拿着6萬元回鄉，以為天下無賊的「儍」羊！
《天》中段有一幕點題的對話，分別為劉華對劉若英的「狼」、「羊」爭論，劉華就力主要「劏羊」，因為被俎之羊從此可知到天有幾高、地有幾厚！劉若英就力主「護羊」，因為世間上「純」如「綿羊」的人已經不多，又為何不能「存其心」呢？這可是電影的主題，入世愈深者愈易走上「狼道」，當大家竊笑「儍」羊無知以為天下無賊，但可有自省，就是因為自己深陷「賊道」呢！
必睇Bonus200張靚靚劇照相簿
論鏡頭運用及攞位，這名中國導演兼編劇的馮小剛，同一般荷李活及港式電影真係好唔同，感覺是在商業之中，仍然是相當有氣魄，感覺有如睇早年的《大江南北》。雖然筆者手中的試片中並冇Bonus碟片，不過據知雙碟版中收錄了接近200張劇照，值得留意！其他特別收錄還有9段從未曝光片段及製作特輯等，只可算是例牌菜式。最後一提大家，DVD碟片的音效是使用DTS-ES及DolbyDigitalEX作收錄，音效絕對直逼戲院級數，上映時未有時間觀賞，今次DVD一樣可以用靚聲作補數。
