容祖兒在剛過去的樂壇四大頒獎禮中，憑一首歌頌母愛的《世上只有》橫掃金曲獎項，更捧走傳媒大獎。年僅二十四歲的祖兒盡領風騷，又坐擁千萬身家，可惜早年父母離異，令她欠缺父愛，感情方面祖兒亦未有着落，難怪她自言是最「乾涸」的女星。
樂壇四大頒獎禮早前已告一段落，容祖兒成為大贏家，她除了憑歌頌母愛的歌曲《世上只有》橫掃金曲獎外，更憑累積的二十個獎項力壓勁敵劉德華，冧莊捧走「傳媒大獎」。
提到頒獎禮佳績，祖兒日前在尖沙嘴接受本報訪問時說：「嗰晚我諗傳媒大獎係畀劉德華，我自己都好想攞，但冇話呢樣係終極目標，攞到呢個獎我會繼續努力。港台頒獎禮之後，我成個人都輕鬆晒，返屋企重食多個公仔麵㖭。」
祖兒當晚捧走傳媒大獎後，第一個來電恭喜她的人是母親，而祖兒第一個打出的電話則是打給老闆楊受成。可是令她心裏十五十六的，就是要不要打電話給當年離棄妻女的父親？最後祖兒還是沒有這樣做。
祖兒說：「我知佢都會開心，諗住打啦，講幾句都好，但後尾都冇打到……好啦，陣間我做完訪問，打畀佢啦。」問祖兒是否仍對父親有所不滿？她說：「係冇嬲過，同佢係一世，我唔了解佢個心係點，作為女嘅話，只係希望佢努力。我成年冇見佢，對佢印象都好模糊，大家了解唔深，所以我想借一首歌去表達。之前我唱畀媽咪嘅有《小天使》、《世上只有》，我模擬咗一封畀佢嘅信，畀咗唱片監製，等佢知我心裏面嘅諗法。」
那麼祖兒是否希望修補父女之間的疏離關係？她點頭說：「講到最尾佢都係我爸爸，但需要時間，有乜事我會幫佢，希望佢有個好好嘅人生。有時我見到阿詩（何韻詩）一家人好好，我好羨慕。」
早前南亞海嘯災情嚴重，祖兒自言此事對其人生有新啟示，她說：「一個浪翻過嚟，幾秒唔使就乜都冇晒，我心裏面係錫佢（父親），雖然冇成日見面，但夜晚會突然之間好掛住，唔知佢嘅生活𠵱家係點呢？」除了對父親憑歌寄意外，祖兒透露會唱一首撫平人心的歌曲，她說：「我嚟緊都會唱啲唔同感覺嘅歌，希望過咗新年之後冇晒災難，我都係想表達自己嘅一啲感覺。」
提到早前有報道指祖兒與楊千嬅為爭女歌手獎而鬧不和，對此祖兒揚言「得啖笑」，她說：「我都係睇報道至知道不和，我哋見到面都有傾吓偈，唔會討厭大家，唔會大家出招，你估拍古裝咩？」
雖然外界認為祖兒唱歌比千嬅好，但千嬅卻勝在發展較全面，祖兒說：「我喺拍戲上未畀到信心人哋，我唔覺唱歌好過千嬅，佢有閱歷，有好多感受，我唱歌係技巧上，吸收到人哋嘅唱腔，同埋我把聲有觀眾緣，唱起情歌好似特別窩心。」
入行五年的祖兒，現時只得二十四歲，但她已盡領風騷，提到是否已有千萬身家，祖兒即笑着點點頭，如此年輕已有此佳績，未知她還有否其他目標？祖兒說：「要打進台灣市場，要求進步，學識多啲待人接物，我𠵱家租屋住，希望可以買間大屋，落地生根。」
