羅兆輝前晚在澳門因涉嫌販毒而被當地警方拘捕，曾跟羅兆輝歐遊的任港秀，以及跟他傳過緋聞的傅天穎和麥家琪等，昨日對羅兆輝被捕事件均拒絕回應，甚至揚言跟對方不相熟，一於跟羅兆輝劃清界線。
曾於○○年燒炭自殺的前上市公司主席羅兆輝，前晚在澳門因涉嫌販毒而被警方拘捕。早年羅兆輝與不少圈中女星傳過緋聞，昨日記者就羅兆輝被捕一事，致電他的一班過氣緋聞女友，包括任港秀、傅天穎（奀妹）、麥家琪、張文慈及樊亦敏等，不過眾人異口同聲表示很久已沒與羅兆輝聯絡，擺明劃清界線。
○二年曾陪羅兆輝歐遊的任港秀昨日在電話中說：「自從嗰件事之後，我哋再冇聯絡，我唔想再回應佢啲嘢。」而昨日有份出席亞視藝員生日活動的麥家琪則透過電話說：「我冇特別嘢想講，我哋冇聯絡好耐。」
至於傅天穎、張文慈及樊亦敏的回應亦大同小異，奀妹說：「其實佢係我朋友嘅男朋友，我哋本身唔係咁熟，我亦冇同佢聯絡電話，唔方便回應啲乜嘢。」張文慈則說：「我從來唔認識呢個人，亦對呢件事冇回應。」而樊亦敏亦說：「件事未清楚，我唔方便講乜嘢，因為要負上法律責任。」
