連老董都話要嚴打官商勾結，市民聽到呢四個字都覺得唔多啱聽，不過未必逢官商勾結都係壞事，財經事務及庫務局局長馬時亨就公然勾結城中富商，搞咗個「財庫盃」高爾夫球賽，參賽者包括多間大銀行高層、公營機構要員、立法會議員同財經事務及庫務局官員，黎年、袁天凡、呂志和、黎文熹、馮鈺斌、黃漢興等通通畀面落場較量。
呢班金融精英球技個個都有番咁上下，結果由立法會議員林健鋒同梁君彥組成嘅隊伍勝出，由於比賽規定勝出者可決定三十六萬元獎金用途，兩名議員都係多金之人，自然好爽手咁捐畀林健鋒做秘書嘅「程思遠（中國-國際）肝炎基金」進行疫苗研究。講起馬仔，佢呢排鬼咁忙，噚晚去咗一家財經雜誌嘅頒獎禮，原來政府嘅五隧一橋同政府債券喺行內獲得八個獎，真係恭喜。
（圖）「財庫盃」發起人馬時亨局長（右二）同勝出者林健鋒議員（右）一齊出席獎金捐贈儀式，旁為胡國興（左）及田北俊。
傳真︰2623-9278
電郵︰