外圍美股繼續跌，港股自然腳軟軟，但比較前日沽壓就明顯減輕，睇嚟冇乜壞消息，恒指上周三低位13352暫時守得住，短期會喺13400至13700水平橫行整固。
恒指輪：策略上仍是恒指跌近13352買恒指C輪博反彈，對象係3505同3700，恒指C輪3505噚日跌9.8%，收9.2仙，3700則跌6.8%，收16.4仙。
買入後若見恒指升近13700受阻，3505及3700不妨先食胡，如果夠進取，可即時反手買入恒指P輪4541或4556，恒指若跌近13400不破計數。
和黃C輪3561：和黃（013）今個禮拜先高後低，周三最高見過72元，噚日跌1元，收70.25元，全周計仍微升1個位，跑贏大市。和黃係最強勢嘅大藍籌，下周如見跌近50日線（69.25元），可買些少C輪博反彈。
和黃C輪3561行使價68元，到期日6月14日，溢價3.7%，槓桿率14.5倍（有效8.4倍），引伸波幅24.4%。昨收0.485元，跌8.5%。另1隻數據差不多的3617亦可考慮，昨收0.29元，跌10.8%。
另方面，如果正股跌穿67.50元，C輪就宜先止蝕，暫時和黃P輪數據冇邊幾隻得，稍為好啲算係3745，但交投相當疏落。隻輪行使價70元，05年7月11日到期，溢價8.2%，槓桿率12.8倍（有效6.1倍），引伸波幅27.3%。昨收0.55元，升3.8%。
章盛