嘉華國際（173）同埋阿仔嘉華建材（027）公布，嘉建獲澳門政府批准注入銀河賭牌。噚日復牌後炒到興高采烈，但唔夠一個鐘頭旋即又停牌。江湖傳聞話因為通告唔清楚，要進一步解釋之故。
但經紀陳條氣就好唔順，話如果監管機構唔高興通告內容，根本就唔好畀嘉華孖寶復牌，噚日好多投資者諗住趁好消息炒番轉，但玩兩玩又被叫停，好多人都走唔切，就算冇事都嚇一場。
雖然濠賭股呢個概念已經炒得好濫，但仍然有公司樂此不疲。經紀陳話，噚日股價突然急升22%的協里控股（729），都係話去濠江發展，重話即將在短期內停牌，甚至會有股東變動。
協里喺今個月，曾經搞過一次批股，以先舊後新方式，配售2.6億股，每股作價8仙，集資額只係2080萬元。經紀陳話，雖然集資額細細，之後股價亦冇咩表現，只係企喺7仙樓上，但噚日突然抽升至9.4仙，成交股數急增至1.64億股，金額1479萬元，睇嚟似乎有啲嘢。
慕容小初