《皆大歡喜》下周播映完畢後，劇中一班演員雖然成為「濕熱（失業）大軍」，但薛家燕（好姨）依然可以食住《皆》劇水尾出埠登台𢱑銀，而前晚在《皆》劇的團年活動中，無綫高層曾勵珍更踢爆好姨經常度期𢱑銀，令工作人員大為頭痛。
將於下周播出第七百七十二集大結局的《皆大歡喜》，前晚假尖沙嘴美麗華酒店舉行「喜上加喜團年宴」，除了一眾《皆》劇演員包括薛家燕、鍾嘉欣、阮兆祥、謝天華、陳彥行、鄧兆尊及馬浚偉等有份出席外，連無綫戲劇分部副總監曾勵珍亦畀面捧場。
席間珍姐自爆說：「我間房可以睇到每一套劇嘅拍攝進度，有次我見到佢哋（指《皆》劇演員）輪流NG係咁笑，我就打畀導演問佢哋笑完未，好似天降梵音咁！」珍姐其後又指一指好姨說：「其實啲PA（助導）好辛苦，啲人成日要搵真錢，一日度期度到黑。」珍姐此言明顯指好姨經常度期，令工作人員十分頭痛，對此好姨惟有笑着打圓場說：「珍姐有時會叫我哋身體檢查（意即照肺）！」
《皆》劇結束後，一眾演員的騷錢大大減少，好姨表示拍完《皆》劇後許多人會失業，但她一時口快快將「失業」講錯為「濕熱」，即時遭阮兆祥取笑。雖然《皆》劇結束，但好姨乘《皆》劇餘威，仍出埠登台𢱑銀，包括美國及新西蘭等地，問好姨的男友會否同行時，她即表示對方工作忙碌，沒有時間一同起程，但下月她會趕返香港與男友共度情人節。
採訪：李珮洳 攝影：林德雄
