趙紫陽同六四有不可分割嘅關係，噚晚支聯會喺維園搞咗個悼念趙紫陽集會；而為咗紀念六四而開辦嘅蘭桂坊六四吧噚晚有乜搞作呢？八方噚晚去過六四吧，老闆冇舉辦悼念趙紫陽活動，反而舉行一年一度為聯合國兒童基金會籌款協助失學兒童嘅活動，將一連兩日晚六點到凌晨三點嘅所有生意額捐出。老闆刻意將酒水售價降低兩、三成，希望多啲人支持捐款活動。支聯會成員岑建勳嘅老婆謝寧，噚晚都有去六四吧支持吓，至於點解唔去悼念趙紫陽，佢話悼念嘅嘢，喺個心度就得㗎啦！
查實六四吧已經轉咗手，𠵱家由五個老闆夾份經營。老闆之一楊雅詩話，噚晚唔舉辦悼念活動，其實係因為唔想再走政治化路線，希望開拓更多客源。佢話自從六四吧喺兩個幾月前重開以來，經過聖誕同新年，生意尚算唔錯，起碼收支平衡。
（圖）易手後嘅六四吧噚晚為聯合國兒童基金會籌款。
傳真︰2623-9278
電郵︰