張栢芝前晚在灣仔會展行時裝騷，示範白雪公主圖案上衣的她漫行天橋，又企不穩和行錯路。事後栢芝歸咎自己分別戴上的紫色和藍色隱形眼鏡所致，更說：「我喺台上飄緊！」
時裝品牌Moiselle前晚在灣仔會展舉行○五年春夏時裝系列展，以「PrincessoftheOpera」為主題，請來名模AnaR.和陳沛嘉等任模特兒，張栢芝則任特別嘉賓行騷。而台下則有羅霖劉坤銘夫婦、梁劉柔芬等捧場睇騷。
栢芝分別穿上白雪公主圖案閃片上衣配銀色短褲，及米白晚裝長裙行騷，但她在台上步伐非常慢，又搖擺不定，後來更走不到直線，斜行半圈才返回正軌。事後栢芝接受訪問時表示今次沒有酬勞，更不介意性感，只是公司不批准。
栢芝又出動私伙彩色隱形眼鏡，她說：「今次啲隱形眼鏡係特別配合假髮嘅顏色同主題，係我早排去日本玩嗰陣，買咗三十幾對潮爆嘅有色隱形眼鏡，呢兩對算係最低調㗎喇，有對紅色我諗住留番拍MV，重有對好有型嘅英國國旗款㖭！」
問到在台上表現失準，栢芝解釋說：「因為我唔記得換高踭鞋，條裙拖地。」至於行錯路，她又說：「我喺台上飄緊！因為對隱形眼鏡唔貼眼，睇嘢矇查查，又要撐大對眼，唔眨得眼，所以冇乜表情囉！我喺台上惟有認住頭頂四盞水晶燈嚟行，若果仆低就好澎湃囉！」
採訪：JessicaNgan 攝影：EdwardChou
