陶喆噚日喺銅鑼灣出席新碟《太平盛世》全球發布會，現場有幾百個歌迷圍觀，都幾熱鬧，唱片公司又即場頒咗三張白金唱片畀佢。
陶喆由四位打扮性感嘅女dancers陪住出場，又放煙花又點火把，現場重安排播放佢嘅新歌《愛我還是他》MV，畫面有佢同女主角瞿穎嘅咀戲，搞到現場嘅歌迷咿嘩鬼叫，陶喆自己都睇到伸晒脷，好尷尬。陶喆重用國語話：「我堅持音樂，不會亂造音樂。」
問到陶喆對同瞿穎嘅咀戲係咪好回味，佢話：「呢個故事係參考張愛玲嘅小說構思，我最先吻的一、兩次還算順利，但第三次時就顯得有些尷尬了，劇情又需要我大力推她，我也怕弄痛她，幸好她沒事。」陶喆表示如果四十歲之前搵唔到啱嘅女友，佢寧可唔結婚，但陶喆𠵱家先三十五歲，距離目標都重有五年，馮仁昭覺得佢只要加把勁實掂啦！
許志安噚日去電台接受訪問，佢話已經開始為二月尾舉行嘅演唱會積極keepfit，除咗一日要花三個鐘頭做運動之外，重要節食，一個星期已經減咗十磅，但當記者一提到鄭秀文嘅時候，安仔就即刻擰晒頭話唔回應。馮仁昭覺得安仔真係要積極準備自己，唔係古巨基喺三月中開演唱會時實搶晒佢啲客。
古巨基噚日到商台接受訪問，對於有線做咗一個市場調查，佢嘅歌曲《愛與誠》成為「最受歡迎歌曲」首位，佢話：「開心到爆標，作為歌手可以有自己嘅飲歌真係好幸運。」
對於有啲受調查嘅人話唔記得有啲歌曲名，問基仔有冇感到樂壇青黃不接？佢話：「我都覺得以前香港樂壇對華語歌曲影響力大啲，𠵱家啲歌手應該團結啲，做好個樂壇。」
身為百事代言人嘅蔡依林日前幫廣告商影咗一批賀年相，相裏面佢拎住細細個嘅獅頭係咁舞，好有活力。
蔡依林稍後會出席百事喺深圳嘅歌迷會同歌迷見面，又會以一個小仙女嘅造型出現，場地會布置成愛麗絲夢遊仙境咁，主題就會講蔡依林喺森林裏邊嘅一個難忘經歷。
周杰倫嘅歌一向受中、港、台嘅歌迷歡迎，佢繼前年獲大馬頒授「旅遊大使」後，今年再重獲得大馬政府頒發模範青年獎，佢開心之餘，重決定下星期四帶埋媽媽同外婆一齊去領獎。周杰倫近日雖然忙緊為月尾嘅大馬演唱會綵排，但佢知道呢個消息後愈加振奮，佢話：「如果大家無聊的話，請來看我的演唱會！」
